സഹകരണ നിക്ഷേപ സമാഹരണം; ജില്ലതല ഉദ്ഘാടനം നാളെ കല്ലാച്ചിയിൽ

നാദാപുരം: 38ാമത് സഹകരണ നിക്ഷേപ സമാഹരണ യജ്ഞം 2018​െൻറ ഭാഗമായുള്ള ജില്ലതല ഉദ്ഘാടനം ബുധനാഴ്ച വൈകീട്ട് നാലിന് കല്ലാച്ചിയിൽ നടക്കുമെന്ന് സ്വാഗതസംഘം ഭാരവാഹികൾ നാദാപുരത്ത് നടത്തിയ വാർത്തസമ്മേളനത്തിൽ അറിയിച്ചു. ജനുവരി 10 മുതൽ െഫബ്രുവരി ഒമ്പതുവരെ നീണ്ടുനിൽക്കുന്ന നിക്ഷേപ സമാഹരണ യജ്ഞത്തിലൂടെ 750 കോടി രൂപയാണ് ജില്ലയിൽനിന്ന് സമാഹരിക്കാൻ ലക്ഷ്യമിടുന്നത്. പരിപാടി നാദാപുരം എം.എൽ.എ ഇ.കെ. വിജയൻ ഉദ്ഘാടനം ചെയ്യും. ജില്ല കലക്ടർ യു.വി. ജോസ് ആദ്യ നിക്ഷേപം സ്വീകരിക്കും. ജനപ്രതിനിധികളും സഹകാരികളും രാഷ്ട്രീയ സാമൂഹിക രംഗത്തെ പ്രമുഖരും പങ്കെടുക്കും. പരിപാടിയോടനുബന്ധിച്ചുള്ള വർണശബളമായ ഘോഷയാത്ര ബുധനാഴ്ച വൈകീട്ട് മൂന്നിന് മിനി സിവിൽ സ്റ്റേഷൻ പരിസരത്തുനിന്ന് ആരംഭിക്കും. വാർത്തസമ്മേളനത്തിൽ അസി. രജിസ്ട്രാർ എ.കെ. അഗസ്റ്റി, വി.പി. കുഞ്ഞികൃഷ്ണൻ, മുഹമ്മദ് ബംഗ്ലത്ത്, ടി. മൂസ, കെ.പി. കുമാരൻ, എ. മോഹൻദാസ് തുടങ്ങിയവർ പങ്കെടുത്തു.