ഹരിത പദ്ധതിക്കായി എടച്ചേരി മാതൃക

നാദാപുരം: കാർഷിക രംഗത്ത് കൂട്ടായ്മയിലൂടെ പുതിയ സംരംഭങ്ങൾക്ക് തുടക്കം കുറിക്കുകയാണ് പ്രവാസികളും നാട്ടുകാരും. എടച്ചേരി കായപ്പനച്ചിയിലെ പൊതുജന വായനശാലയും ദുബൈ, ഖത്തർ കെ.എം.സി.സി പ്രവർത്തകരും സംയുക്തമായി കായപ്പനച്ചി തോട്ടോളിപ്പള്ളിക്ക് സമീപം അര ഏക്കറിലധികം വരുന്ന സ്ഥലത്ത് കൃഷിയിറക്കി. മത്തൻ, വെള്ളരി, പടവലം, കയ്പ, പയർ, ചീര തുടങ്ങി എല്ലാവിധ പച്ചക്കറികളും ഇവർ കൃഷി ചെയ്യുന്നുണ്ട്. ഇതിലൂടെ ലഭിക്കുന്ന വരുമാനം എടച്ചേരിയിലെ തന്നെ ജീവകാരുണ്യ പ്രവർത്തനങ്ങൾക്ക് വിനിയോഗിക്കും. പച്ചക്കറിവിത്തുകൾ നട്ട് എടച്ചേരി ഗ്രാമപഞ്ചായത്ത് പ്രസിഡൻറ് ടി.കെ. അരവിന്ദാക്ഷൻ പരിപാടി ഉദ്ഘാടനം ചെയ്തു. പഞ്ചായത്ത് കൃഷി ഓഫിസര്‍ ശ്രീജ മുഖ്യാതിഥിയായി. കെ.എം.സി.സി പ്രവർത്തകൻ ഫജറുസാദിഖ് തോട്ടോളി അധ്യക്ഷത വഹിച്ചു. വാര്‍ഡ് അംഗങ്ങളായ തടത്തില്‍ രാധ, എം.കെ. ചന്ദ്രി, ദുബൈ കെ.എം.സി.സി സംസ്ഥാന വൈസ് പ്രസിഡൻറ് എന്‍.കെ. ഇബ്രാഹിം, ടി.കെ. അഹമ്മദ്‍, എം.പി. അഷ്റഫ്, യു.പി. മൂസ‍, സിയാദ് കല്ലറക്കൽ, കെ. പുരുഷു, കെ.പി. കുഞ്ഞമ്മദ്, നാമത്ത് പോക്കര്‍ ഹാജി, കെ. ബാബു എന്നിവർ സംസാരിച്ചു.