ചേനായിക്കടവിലെ അനധികൃത മണൽവാരൽ: തീരമിടിയുന്നു ജലക്ഷാമം രൂക്ഷം

പേരാമ്പ്ര: ചേനായിക്കടവിൽനിന്ന് അനധികൃതമായി മണൽവാരുന്നതു കാരണം തീരമിടിയുകയും ജലക്ഷാമം രൂക്ഷമാവുകയും ചെയ്യുന്നു. പകൽ, രാത്രി ഭേദമില്ലാതെ വലിയ തോതിലാണ് ഇവിടെനിന്നും മണലൂറ്റുന്നത്. തോണിയിൽ മണൽ വാരി കല്ലൂർ, വേളം ഭാഗങ്ങളിലെത്തിച്ചാണ് വിൽപന. വൻതോതിലുള്ള മണൽവാരൽ കാരണം തീരം വ്യാപകമായി ഇടിയുന്നുണ്ട്. ലക്ഷങ്ങൾ മുടക്കി കരിങ്കല്ലുകൊണ്ട് തീരം കെട്ടി സംരക്ഷിച്ചെങ്കിലും അതെല്ലാം തകർന്നിരിക്കുകയാണ്. പ്രദേശത്തുള്ളവർ ജലക്ഷാമത്തി​െൻറ പിടിയിലുമാണ്. കാപ്പുമ്മൽ, കൈപ്രം കോളനിവാസികൾ കുടിവെള്ളക്ഷാമം അനുഭവിക്കുകയാണ്. അമിത മണലെടുപ്പ് കാരണം പുഴയിലേക്ക് ഉപ്പുവെള്ളം കയറുന്നത് പ്രദേശത്തെ ജലസ്രോതസ്സുകളെ ബാധിക്കുന്നു. കുറ്റ്യാടി പുഴയിലെ വിവിധ കടവുകളിൽ നടക്കുന്ന അനധികൃത മണൽവാരൽ നിയന്ത്രിക്കാൻ പൊലീസ് ശക്തമായ ഇടപെടൽ നടത്തണമെന്നാണ് പരിസ്ഥിതി പ്രവർത്തകർ ആവശ്യപ്പെടുന്നത്.