ശംസുല്‍ ഉലമ ചെയര്‍ പ്രഖ്യാപന സമ്മേളനം തുടങ്ങി

കോഴിക്കോട്: ശംസുല്‍ ഉലമ ചെയര്‍പ്രഖ്യാപന സമ്മേളനത്തിന് തുടക്കമായതായി ശംസുല്‍ ഉലമ മെമ്മോറിയല്‍ ഇസ്‌ലാമിക് കോംപ്ലക്‌സ് ജനറല്‍ സെക്രട്ടറി അബ്ദുല്‍ഗഫൂര്‍ ദാരിമി മുണ്ടക്കുളം അറിയിച്ചു. കൊണ്ടോട്ടിക്കടുത്ത് മുണ്ടക്കുളത്തെ എസ്.എം.ഐ.സി കാമ്പസിൽ ശംസുല്‍ ഉലമയുടെ 22ാം ഉറൂസ് മുബാറക്കിനോടനുബന്ധിച്ചാണ് ചെയര്‍ പ്രഖ്യാപന സമ്മേളനം നടക്കുന്നത്. വെള്ളിയാഴ്ച ഉച്ചക്ക് 2.15ന് നടക്കുന്ന പറമ്പില്‍പള്ളി ശഹീദ് അലിയ്യുല്‍ ബകരി അനുസ്മരണത്തിനും മൗലീദ് പാരായണത്തിനും നാസര്‍ ഹയ്യ് ശിഹാബ് തങ്ങള്‍ കൊടികയറ്റുന്നതോടെ തുടക്കമാവും. ശനിയാഴ്ച വൈകീട്ട് ഏഴിന് നടക്കുന്ന ശംസുല്‍ ഉലമ ചെയര്‍ ആന്‍ഡ് ജാമിഅ ജലാലിയ്യ സനദ്ദാന പ്രഖ്യാപന സമ്മേളനം സമസ്ത കേരള ജംഇയ്യത്തുല്‍ ഉലമ പ്രസിഡൻറ് മുഹമ്മദ് ജിഫ്രി മുത്തുക്കോയ തങ്ങള്‍ ഉദ്ഘാടനം ചെയ്യും. പാണക്കാട് ഹമീദലി ശിഹാബ് തങ്ങള്‍ അധ്യക്ഷനാവും. സമസ്ത കേരള ജംഇയ്യത്തുല്‍ ഉലമ ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍, പി.കെ. കുഞ്ഞാലിക്കുട്ടി എം.പി, പി.വി. അബ്ദുല്‍വഹാബ് എം.പി, കെ.വി. മുഹമ്മദ് അയിലക്കാട് എന്നിവർ പങ്കെടുക്കും. വാർത്ത സമ്മേളനത്തിൽ അന്‍വര്‍ മുതുവല്ലൂര്‍, മാമുക്കോയ ഹാജി, ജംഷീദ് രണ്ടത്താണി, കെ.ടി. അബ്ദുൽ ഹക്കീം എന്നിവർ പങ്കെടുത്തു.