ആവള മലബാർ ടീ ഷോപ്പിലെ ചായ കുടിച്ചപ്പോൾ മനസ്സും നിറഞ്ഞു

പേരാമ്പ്ര: ആവള മഠത്തിൽമുക്കിലെ 'മലബാർ' ടീ ഷോപ്പിലെ ചായ കുടിച്ചപ്പോൾ വയർ മാത്രമല്ല മനസ്സും നിറഞ്ഞിരിക്കുകയാണെന്ന് നാട്ടുകാർ. ചായക്കട നടത്തുന്ന ബാലകൃഷ്ണനും ഭാര്യയും കഴിഞ്ഞ ദിവസം കിട്ടിയ വരുമാനം മുഴുവൻ മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകിയിരിക്കുകയാണ്. നിത്യച്ചെലവിനുവേണ്ടി ചായക്കട നടത്തുന്ന ബാലകൃഷ്ണൻ ത​െൻറ പ്രാരബ്ധങ്ങൾ മാറ്റിവെച്ചാണ് ദുരിതബാധിതരെ സഹായിക്കാൻ സന്നദ്ധനായത്. വരുമാനം ദുരിതാശ്വാസ നിധിയിലേക്കാണെന്നറിഞ്ഞതോടെ ചായക്കടയിൽ തിരക്കും വർധിച്ചു. ചെറുവണ്ണൂർ ഗ്രാമപഞ്ചായത്ത് പ്രസിഡൻറ് കെ.പി. ബിജു, മുൻ ബ്ലോക്ക് പ്രസിഡൻറ് എം. കുഞ്ഞമ്മദ് എന്നിവർ ഉൾപ്പെടെ നിരവധി പേരാണ് മലബാർ ടീ ഷോപ്പിൽ എത്തിയത്.