കാലിക്കറ്റിൽ സിവില്‍ സർവിസ്​ അക്കാദമി സ്​ഥാപിക്കും -വി.സി

തേഞ്ഞിപ്പലം: സിവിൽ സർവിസ് പരീക്ഷയിൽ മികച്ച പരിശീലന സൗകര്യമൊരുക്കാൻ കാലിക്കറ്റ് സര്‍വകലാശാലയില്‍ സിവില്‍ സർവിസ് അക്കാദമി സ്ഥാപിക്കുന്നു. തുടക്കമെന്ന നിലയിൽ അഫിലിയേറ്റഡ് കോളജുകളിലെ വിദ്യാർഥികള്‍ക്ക് അവധി ദിനങ്ങളില്‍ ക്ലാസുകള്‍ നടത്തുമെന്ന് വൈസ് ചാന്‍സലര്‍ ഡോ. കെ. മുഹമ്മദ് ബഷീര്‍ പറഞ്ഞു. സിവില്‍ സർവിസ് കരസ്ഥമാക്കിയവര്‍ക്ക് സ്വീകരണവും സിവില്‍ സർവിസ് ശില്‍പശാലയും ഉദ്ഘാടനം െചയ്യുകയായിരുന്നു അദ്ദേഹം. ജേതാക്കളായ എസ്. അഞ്ജലി, സി.എം. ഇര്‍ഷാദ്, ഷാഹിദ് ടി. കോമത്ത്, നാഗലാൻഡിലെ കിഫിരെ ജില്ല കലക്ടർ മുഹമ്മദലി ശിഹാബ്, മുന്‍ ഐ.എ.എസ് ഉദ്യോഗസ്ഥന്‍ ഡോ. പി. സരിന്‍ എന്നിവരെ വൈസ് ചാന്‍സലര്‍ ആദരിച്ചു. മുന്‍ വൈസ് ചാന്‍സലര്‍ പ്രഫ. അന്‍വര്‍ സുബേരി വിശിഷ്ടാതിഥിയായിരുന്നു. പ്രോ വൈസ് ചാന്‍സലര്‍ ഡോ. പി. മോഹന്‍ അധ്യക്ഷതവഹിച്ചു. രജിസ്ട്രാര്‍ ഡോ. ടി.എ. അബ്ദുല്‍ മജീദ്, സിൻഡിക്കേറ്റ് അംഗം കെ.കെ. ഹനീഫ, ഡോ. സി.സി. ഹരിലാൽ, എം.വി. സക്കറിയ, എൻ.വി. സമീറ തുടങ്ങിയവര്‍ പങ്കെടുത്തു.