പച്ചപ്പിനെക്കുറിച്ച് പറഞ്ഞ് മതിവരാത്തൊരാൾ...

വടകര: ഏറാമലയിലെ മറുവയിൽ സൂപ്പിക്ക് ത‍​െൻറ കാർഷികവൃത്തിയെക്കുറിച്ച് പറഞ്ഞാൽ മതിവരില്ല. അത്രമാത്രം ഈ മണ്ണിനെ സ്നേഹിക്കുന്നുണ്ട് ഇയാൾ. ഒരു ഏക്കർ ഭൂമി പാട്ടത്തിനെടുത്താണ് കൃഷിയിറക്കുന്നത്. ഇത്തവണ സംസ്ഥാന സർക്കാർ ഏറെ കൊട്ടിഘോഷിച്ച് പ്രഖ്യാപനം നടത്തിയ 'ഓണത്തിന് ഒരുമുറം പച്ചക്കറി' പദ്ധതി ജില്ലയിൽ പൂർണ പരാജയമായപ്പോൾ ഏറാമല പഞ്ചായത്തിന് നേട്ടമായത് സൂപ്പിയുടെ അവസരോചിത ഇടപെടലാണ്. ആവശ്യത്തിന് ജീവനക്കാരില്ലാത്തതി‍​െൻറയും മറ്റും പരിമിതി കാരണം കൃഷിഭവൻ അധികൃതർക്ക് കൃത്യസമയത്ത് വിത്തുകൾ വിതരണം ചെയ്യാൻ കഴിഞ്ഞിരുന്നില്ല. അപ്പോഴാണ് സർക്കാർ പ്രഖ്യാപനം കണ്ടറിഞ്ഞ് ത‍​െൻറ പാട്ടഭൂമിയിലെ നാനൂറിലേറെ വരുന്ന വാഴകൾക്കിടയിൽ പച്ചക്കറി കൃഷിയിറക്കിയത്. വെണ്ട, ചീര, വെള്ളരി തുടങ്ങിയവയാണ് കൃഷിചെയ്തത്. സമയബന്ധിതമായി വിളവെടുത്തപ്പോൾ അത്, പഞ്ചായത്തി‍​െൻറതന്നെ ഉത്സവമായി. കനത്ത മഴയിലാണ് പച്ചക്കറി വിത്തുകൾ നട്ടതെങ്കിലും നല്ലവിള ലഭിച്ചു. നേന്ത്രവാഴക്കുല കിലോക്ക് 80 രൂപയായതി​െൻറ ത്രില്ലിലാണ് സൂപ്പി. ജൈവ കാർഷിക രീതിയാണിദ്ദേഹം പിന്തുടരുന്നത്. കഴിഞ്ഞദിവസം ത‍​െൻറ കൃഷിയിടത്തിൽ ഓണത്തിനുശേഷമുള്ള പച്ചക്കറികളുടെ വിളവെടുപ്പ് സൂപ്പിയുടെ സഹപാഠി പാറോളി ഇല്ലത്ത് കേശവൻ നമ്പൂതിരി നിർവഹിച്ചു. 2013-14 വർഷത്തിൽ ജില്ലയിലെ ഏറ്റവും നല്ല കർഷകനായി തെരഞ്ഞെടുക്കപ്പെട്ട സൂപ്പി പറയാനുള്ളത് ഇത്രമാത്രം. 'കൃഷിചെയ്യാനുള്ള മനസ്സുണ്ടോ, എങ്കിൽ ഈ മണ്ണ് ചതിക്കില്ല'.