വിദ്യാർഥികൾക്ക്​ 'ഇൻറർവ്യൂ'; മുക്കം ബസ്​സ്​റ്റാൻഡിൽ മിന്നൽപരിശോധന

മുക്കം: ബസ്സ്റ്റാൻഡിൽ മോട്ടോർ വെഹിക്കിൾ ഡിപ്പാർട്മ​െൻറ് ഉദ്യോഗസ്ഥർ മിന്നൽപരിശോധന നടത്തി. പെരുമഴയത്തും വെയിലത്തും മലയോരപ്രദേശങ്ങളിലെ വിദ്യാർഥികളെ ക്ലീനർമാർ 'ഇൻറർവ്യൂ' ചെയ്ത് ബസിൽ കയറ്റുന്നതി​െൻറ ദുരിതകഥ 'മാധ്യമം' വാർത്തയാക്കിയിരുന്നു. ഇതേതുടർന്ന് ഉദ്യോഗസ്ഥർ ബുധനാഴ്ച അഞ്ചോടെയാണ് ബസ്സ്റ്റാൻഡിലെത്തി മിന്നൽപരിശോധന നടത്തിയത്. ഉദ്യോഗസ്ഥർ വന്നപ്പോഴും വിദ്യാർഥികൾ ക്യൂവിൽ നിൽക്കുന്ന കാഴ്ചയായിരുന്നു. ഒടുവിൽ ബസുകാർക്ക് താക്കീത് നൽകി ഒഴിവാക്കുകയായിരുന്നു. കഴിഞ്ഞ ദിവസങ്ങളിൽ സമൂഹമാധ്യമങ്ങളിലും മഴയത്തു കുട്ടികൾ വരിനിൽക്കുന്ന ചിത്രങ്ങൾ പ്രചരിച്ചിരുന്നു. തുടർന്നുള്ള ദിവസങ്ങളിലും പരിശോധന കർശനമാക്കുമെന്ന് ഉദ്യോഗസ്ഥർ പറഞ്ഞു.