സംഗീത പരിശീലനം

കോഴിക്കോട്: ദേവരാജൻ മാസ്റ്ററുടെ 90ാം ജന്മ വാർഷികത്തോടനുബന്ധിച്ച് വിദ്യാർഥികൾക്ക് സൗജന്യമായി സംഗീതപരിശീലനം നൽകുമെന്ന് ജി. ദേവരാജൻ മാസ്റ്റർ മ്യൂസിക് അക്കാദമി ഭാരവാഹികൾ അറിയിച്ചു. ദേവരാജൻ മാസ്റ്ററുടെ ഓർമക്ക് വെസ്റ്റ്ഹില്ലിൽ സ്ഥാപിച്ച മ്യൂസിക് അക്കാദമിയാണ് 200 വിദ്യാർഥികൾക്ക് ഒരുവർഷം നീളുന്ന പരിശീലനം നൽകുക. ജന്മ വാർഷികത്തോടനുബന്ധിച്ച് 27, 28 തീയതികളിൽ വിവിധ വേദികളിലായി ഗാനാലാപന മത്സരവും സംഘടിപ്പിക്കും. 27ന് വൈകീട്ട് അഞ്ചിന് മാനാഞ്ചിറ സ്പോർട്സ് കൗൺസിൽ ഹാളിൽ സംഗീതജ്ഞൻ കാഞ്ഞങ്ങാട് രാമചന്ദ്രൻ ഉദ്ഘാടനം ചെയ്യും. തുടർന്ന് ദേവരാജൻ മാസ്റ്റർ ഈണം നൽകിയ ഗാനങ്ങളുടെ ആലാപന മത്സരം നടക്കും. 28ന് വൈകീട്ട് അഞ്ചിന് പൊലീസ് ക്ലബിൽ 'മധുരിക്കും ഓർമകൾ' എന്ന പഴയ ഗാനങ്ങളുടെ ആലാപന മത്സരവും നടത്തും. വാർത്തസമ്മേളനത്തിൽ മാനേജിങ് ഡയറക്ടർ വി.പി. ശിവദാസൻ, രക്ഷാധികാരികളായ കെ.പി. വിജയകുമാർ, സന്തോഷ് പാലക്കട എന്നിവർ പങ്കെടുത്തു.