നവരാത്രിക്കായി ബൊമ്മക്കൊലു ഒരുങ്ങി

കോഴിക്കോട്: നവരാത്രി മഹോത്സവത്തി​െൻറ ഭാഗമായി തളി ബ്രാഹ്മണ സമൂഹമഠത്തിൽ ബൊമ്മക്കൊലു ഒരുങ്ങി. ഒമ്പത് പടികളിലായിട്ടാണ് ബൊമ്മകൾ ഒരുക്കിയിട്ടുള്ളത്. ദശാവതാരം, ശ്രീരാമ പട്ടാഭിഷേകം, അഷ്ടലക്ഷ്മി, അർധനാരീശ്വരൻ, കാളിയ മർദനം, വള്ളികല്യാണം, ശിവപാർവതി, ഗണപതി-മുരുകൻ, ശ്രീഅയ്യപ്പൻ, രുഗ്മിണി കല്യാണം, ഗോശാല കൃഷ്ണൻ, വെങ്കിടാചലപതി തുടങ്ങിയ ബൊമ്മകളാണിത്. നവരാത്രി ദിവസങ്ങളിൽ ബൊമ്മക്കൊലു മണ്ഡപത്തിൽ രാവിലെയും വൈകുന്നേരവും അർച്ചന, നിവേദ്യം, ദീപാരാധന എന്നിവ നടക്കും. എല്ലാ ദിവസവും വൈകീട്ട് ആറുമുതൽ ഒമ്പതുവരെ ബൊമ്മക്കൊലു കാണാൻ ഭക്തജനങ്ങൾക്ക് അവസരമുണ്ടാകും.