റോഡിലെ മെറ്റൽകൂന; നരിക്കുനി നന്മണ്ട റോഡിൽ അപകടക്കെണി

നരിക്കുനി: നരിക്കുനി- നന്മണ്ട റോഡിലെ ചെങ്ങോട്ടുപൊയിലിൽ റോഡരികിലെ മെറ്റൽകൂന അപകടക്കെണിയൊരുക്കുന്നു. കഴിഞ്ഞ ദിവസം ബസും മോട്ടോർ സൈക്കിളും കൂട്ടിയിടിച്ച് രണ്ടു പേർക്ക് സാരമായ പരിക്കേറ്റിരുന്നു. കാക്കൂർ റോഡ് നിർമാണത്തിന് വേണ്ടിയാണ് ഇവിടെ മെറ്റലും മറ്റു റോഡ് നിർമാണ വസ്തുക്കളും ഇറക്കിയിട്ടിരിക്കുന്നത്. ഇത് ടാറിട്ട റോഡിലേക്ക് താഴ്ന്ന് വരുന്നതുമൂലം വാഹനങ്ങൾക്കും കാൽനടയാത്രക്കാർക്കും വശങ്ങളിലേക്ക് മാറാനാവാത്ത അവസ്ഥ സൃഷ്ടിക്കുന്നു. സാധനങ്ങൾ ഇറക്കിയിട്ടതി​െൻറ മറുഭാഗത്ത് വൈദ്യുതി പോസ്റ്റ് ഉള്ളതും വശങ്ങളിലേക്ക് മാറി നിൽക്കുന്നതിന് തടസ്സമാവുകയാണ്. പിഞ്ചു വിദ്യാർഥികളും മറ്റും മദ്രസയിലേക്കും സ്കൂളിലേക്കും ഇതുവഴി പോകുമ്പോഴും അപകട സാധ്യത നിലനിൽക്കുകയാണ്. റോഡ് നിർമാണത്തിനുവേണ്ടി ഇറക്കിയ സാമഗ്രികൾ അടിയന്തരമായി മാറ്റിയിടണമെന്നാണ് നാട്ടുകാർ ആവശ്യപ്പെടുന്നത്.