ആർ.എം.പി.ഐ ജില്ല കൺവെൻഷൻ അത്തോളിയിൽ

അത്തോളി: ആർ.എം.പി.ഐ ജില്ല കൺവെൻഷൻ ഒക്ടോബർ എട്ട്, ഒമ്പത് തീയതികളിൽ അത്തോളിയിൽ നടക്കുമെന്ന് ഭാരവാഹികൾ വർത്തസമ്മേളനത്തിൽ അറിയിച്ചു. എട്ടിന് രാവിലെ 10 മണിക്ക് ടി.പി. ചന്ദ്രശേഖരൻ നഗറിൽ നടക്കുന്ന പ്രതിനിധി സമ്മേളനം സംസ്ഥാന ചെയർമാൻ ടി.എൽ. സന്തോഷ് ഉദ്ഘാടനം ചെയ്യും. ജില്ലയിലെ പത്ത് ഏരിയ കമ്മിറ്റികളിൽ നിന്നായി 200 പ്രതിനിധികൾ സമ്മേളനത്തിൽ പങ്കെടുക്കും. ഒമ്പതിന് വൈകീട്ട് അഞ്ചിന് ഗൗരി ലങ്കേഷ് നഗറിൽ നടക്കുന്ന പൊതുസമ്മേളനം ആർ.എം.പി.ഐ തമിഴ്നാട് സംസ്ഥാന സെക്രട്ടറി കെ. ഗംഗാധർ ഉദ്ഘാടനം ചെയ്യും. കേന്ദ്ര-സംസ്ഥാന സർക്കാറുകളുടെ ജനവിരുദ്ധനയങ്ങൾക്കെതിരെ പ്രക്ഷോഭങ്ങൾ നടത്തൽ കൺവെൻഷൻ ചർച്ച ചെയ്യും. ജില്ല സെക്രട്ടറി കെ.പി. പ്രകാശൻ, ചെയർമാൻ കെ.കെ. കുഞ്ഞിക്കണാരൻ, സ്വാഗതസംഘം കൺവീനർ പി. സോമൻ, ചെയർമാൻ എ.എം. രാജു, എൻ.കെ. ദിലീഷ് കുമാർ എന്നിവർ വാർത്തസമ്മേളനത്തിൽ പങ്കെടുത്തു.