തിരുവള്ളൂർ പഞ്ചായത്ത് മത്സ്യമാർക്കറ്റിന് ശാപമോക്ഷമാകുന്നു

നവീകരണത്തിന് 48 ലക്ഷം രൂപ അനുവദിച്ചു തിരുവള്ളൂർ: മാലിന്യംനിറഞ്ഞും അസൗകര്യങ്ങളാലും വീർപ്പുമുട്ടുന്ന പഞ്ചായത്ത് മത്സ്യമാർക്കറ്റിന് ശാപമോക്ഷമാകുന്നു. കാൽനൂറ്റാണ്ടിനു മുമ്പ് നിർമിച്ച മാർക്കറ്റ് കെട്ടിടം നവീകരിക്കാനും ആധുനിക സൗകര്യങ്ങൾ ഏർപ്പെടുത്താനും പാറക്കൽ അബ്ദുല്ല എം.എൽ.എയുടെ ആസ്തി വികസന ഫണ്ടിൽനിന്ന് 48 ലക്ഷംരൂപ അനുവദിച്ചു. പഞ്ചായത്ത് ഭരണ സമിതിയുടെയും വാർഡംഗം എഫ്.എം. മുനീറി​െൻറയും ശ്രമഫലമായാണ് തുക അനുവദിച്ചത്. എം. കുഞ്ഞിക്കണ്ണൻ വൈദ്യർ ഗ്രാമപഞ്ചായത്ത് പ്രസിഡൻറായിരിക്കെ അന്നത്തെ സ്വയംഭരണ മന്ത്രി സി.ടി. അഹമ്മദലിയാണ് മാർക്കറ്റ് ഉൾപ്പെടുന്ന കെട്ടിടം ഉദ്ഘാടനം ചെയ്തത്. അതിനുശേഷം കാര്യമായ അറ്റകുറ്റപ്പണികളൊന്നും നടന്നിട്ടില്ല. മേൽക്കൂരയുടെ ഷീറ്റ് പലഭാഗത്തും ദ്രവിച്ച അവസ്ഥയിലാണ്. മാർക്കറ്റി​െൻറ തറ പലയിടത്തും തകർന്നിട്ടുമുണ്ട്. മാലിന്യ സംസ്കരണത്തിന് യാതൊരു സൗകര്യങ്ങളുമില്ല. പ്ലാസ്റ്റിക് ഉൾപ്പെടെയുള്ള മാലിന്യം മാർക്കറ്റ് പരിസരത്ത് കെട്ടിക്കിടക്കുന്ന അവസ്ഥയിലാണ്. മലിനജലം കെട്ടിക്കിടക്കുന്നത് കൊതുകുകൾ വളരാൻ ഇടയാക്കുന്നുണ്ട്. മാസ്റ്റർ പ്ലാനി​െൻറ അടിസ്ഥാനത്തിൽ മാർക്കറ്റ് നവീകരണം ഉടൻ യാഥാർഥ്യമാക്കുമെന്ന് അധികൃതർ അറിയിച്ചു.