മോഷണക്കേസിൽ ഒരു പ്രതി കൂടി പിടിയിൽ

മേപ്പയൂർ: മേപ്പയൂർ ടൗണിൽ കടകളിൽ മോഷണം നടത്തിയ കേസിൽ ഒരു പ്രതിയെ കൂടി മേപ്പയൂർ പൊലീസ് അറസ്റ്റ് ചെയ്തു. മുളിയങ്ങൽ ലക്ഷം വീട് കോളനിയിൽ കരിമ്പാംകുന്ന് സതീശനെയാണ് (27) മേപ്പയൂർ പൊലീസ് പിടികൂടിയത്. പയ്യോളി കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമാൻഡ് ചെയ്തു. കൽപത്തൂർ പാറയിൽ മീത്തൽ വിഷ്ണുവിനെ (20) കഴിഞ്ഞദിവസം അറസ്റ്റ് ചെയ്തിരുന്നു. പ്രതികൾ മുമ്പും നിരവധി കളവ് കേസുകളിൽ ഉൾപ്പെട്ടിരുന്നുവെന്ന് മേപ്പയൂർ എസ്.ഐ യുസഫ് നടുത്തറമ്മൽ പറഞ്ഞു. ടൗണിൽ പട്രോളിങ് ശക്തിപ്പെടുത്തുമെന്നും എസ്.ഐ പറഞ്ഞു.