മുളിയങ്ങലിൽ മിനിലോറികൾ കൂട്ടിയിടിച്ചു; സംസ്ഥാനപാതയിൽ ഗതാഗതം മുടങ്ങി

പേരാമ്പ്ര: കുറ്റ്യാടി-കോഴിക്കോട് സംസ്ഥാനപാതയിൽ മുളിയങ്ങൽ ടൗണിൽ മിനിലോറികൾ കൂട്ടിയിടിച്ച് ചൊവ്വാഴ്ച ഉച്ചയോടെ ഏറെനേരം ഗതാഗതം മുടങ്ങി. ഉള്ള്യേരി ഭാഗത്തേക്ക് പോകുന്ന കെ.എൽ 56 ബി 8187 മിനിലോറി മുളിയങ്ങൽ ബസ്സ്റ്റോപ്പിനടുത്തുള്ള ഹംപിൽ കയറി നിയന്ത്രണം വിട്ട് എതിർഭാഗത്തുനിന്ന് മണ്ണുമായി വരുകയായിരുന്ന കെ.എൽ.56 ഏ 5918 മിനിലോറിയിൽ ഇടിക്കുകയായിരുന്നു. ഇടിയുടെ ആഘാതത്തിൽ ഉള്ള്യേരിക്ക് പോകുന്ന ലോറിയുടെ ഗ്ലാസ് തകർന്നു. മണ്ണ് ലോറിയുടെ മുൻഭാഗം തകരുകയും സ്റ്റിയറിങ് പ്രവർത്തനരഹിതമാവുകയും ചെയ്തു. ഇത് മറ്റൊരു ടിപ്പർ ലോറി ഉപയോഗിച്ച് കെട്ടിവലിച്ചാണ് ഗതാഗത തടസ്സം നീക്കിയത്. പേരാമ്പ്രയിൽ എസ്.ഐ ജോസി​െൻറ നേതൃത്വത്തിൽ പോലീസെത്തി ഗതാഗതതടസ്സമൊഴിവാക്കി. ഈ സമയം രോഗികളുമായി വന്ന ആംബുലൻസ് ഉൾപ്പെടെ വാഹനങ്ങൾ ഏറെനേരം ഗതാഗതക്കുരുക്കിൽ പെട്ടു .