പൊതുയോഗ പരിസരത്ത് സ്​ഫോടനം; സംഘർഷം

കക്കട്ടിൽ: കുന്നുമ്മൽ പഞ്ചായത്തിലെ ചെറിയ കൈവേലിയിൽ ബി.ജെ.പി പൊതുയോഗ പരിസരത്ത് സ്ഫോടനം നടന്നത് സംഘർഷത്തിനിടയാക്കി. ബി.ജെ.പി.യിൽനിന്ന് രാജിവെച്ച ചിലർ സി.പി.എമ്മിലേക്ക് പോയതുമായി ബന്ധപ്പെട്ട് ബി.ജെ.പി നടത്തിയ വിശദീകരണ പൊതുയോഗ പരിസരത്താണ് ഞായറാഴ്ച രാത്രി സ്ഫോടനമുണ്ടായത്. രാജിവെച്ചവർക്ക് കഴിഞ്ഞയാഴ്ച സി.പി.എം സ്വീകരണം നൽകുകയും പൊതുയോഗം സംഘടിപ്പിക്കുകയും ചെയ്തിരുന്നു. ഇതിനു പകരമായാണ് ബി.ജെ.പിയുടെ പൊതുയോഗം. ഇവിടെ സി.പി.എം സ്ഥാപിച്ച കൊടിമരം തകർത്തതായി പറയപ്പെടുന്നു. കുറ്റ്യാടി സി.ഐയുടെ നേതൃത്വത്തിൽ ശക്തമായ പൊലീസ് സംഘം ക്യാമ്പ് ചെയ്യുന്നുണ്ട്.