ചെറൂപ്പ– കുറ്റിക്കടവ് റോഡ് നവീകരണത്തിന് ഭരണാനുമതി

മാവൂർ: ചെറൂപ്പ- കുറ്റിക്കടവ് റോഡ്​ നവീകരണത്തിന് 2.25 കോടി രൂപയുടെ ഭരണാനുമതിയായി. റോഡ് കെട്ടിയുയർത്തി ടാർ ചെയ്യാനും ഡ്രൈനേജ് നിർമിക്കാനും മൂന്നിടത്ത് തോടിന് കൽവർട്ട് കെട്ടാനുമാണ് പദ്ധതി. പൊതുമരാമത്ത് വകുപ്പി​​െൻറ ഫണ്ട് ഉപയോഗിച്ചാണ് നവീകരണം. നവീകരണത്തോടെ റോഡി​​െൻറ ശോച്യാവസ്​ഥക്ക് പരിഹാരമാകും. മൂഴിപ്പുറത്ത് താഴം മുതൽ കുറ്റിക്കടവ് വരെ റോഡ് കെട്ടിയുയർത്തും. ചെറൂപ്പ ജങ്ഷൻ മുതൽ കോൺക്രീറ്റ് ചെയ്ത് നടപ്പാത നിർമിക്കും. രണ്ടു പതിറ്റാണ്ടുകാലമായി അറ്റകുറ്റപ്പണിയൊന്നും നടക്കാത്ത റോഡ് ടാറിങ് തകർന്ന് ശോച്യാവസ്​ഥയിലായിരുന്നു. ഏറെ മുറവിളിക്കൊടുവിൽ ആഴ്ചകൾക്കു മുമ്പാണ് റോഡിൽ അറ്റകുറ്റപ്പണി നടന്നത്. റോഡ് തകർന്നതിനെ തുടർന്ന് ചെറൂപ്പ അങ്ങാടിയിൽ നാട്ടുകാർ വാഴ നട്ട് പ്രതിഷേധിച്ചിരുന്നു. അഴുക്കുചാൽ ഇല്ലാത്തതിനാൽ റോഡി​​െൻറ ഇരുഭാഗത്തെയും മണ്ണൊലിച്ചുപോയി വഴിയാത്ര ദുഷ്കരമായിരുന്നു. ഇരുഭാഗത്തും നടപ്പാത നിർമിക്കുന്നതോടെ ഈ പ്രശ്നത്തിന് പരിഹാരമാകും. റോഡി​​െൻറ നവീകരണ പ്രവൃത്തിക്കായി സാങ്കേതികാനുമതി തേടിയിട്ടുണ്ട്.