ടാറിങ്​ കഴിഞ്ഞിട്ട് മാസങ്ങൾ, റോഡിൽ വീണ്ടും ഗർത്തങ്ങൾ

ഫറോക്ക്: ടാറിങ് കഴിഞ്ഞിട്ട് മാസങ്ങൾ തികയുംമുമ്പ് ഫറോക്ക് -കരുവൻതിരുത്തി റോഡിൽ വീണ്ടും ഗർത്തങ്ങൾ രൂപപ്പെട്ടു. കരുവൻതിരുത്തി റോഡിലെ കോമൺവെൽത്ത് ഓട്ടുകമ്പനിക്ക് സമീപവും ചായിച്ചൻ വളവിലെ സ്വകാര്യ കാർ വർക്ക് ഷോപ്പിനു മുന്നിലുമാണ് വൻ ഗർത്തങ്ങൾ രൂപപ്പെട്ടത്. ലക്ഷങ്ങള്‍ െചലവഴിച്ചാണ് മാസങ്ങൾക്കുമുമ്പ് ഫറോക്ക് നഗരസഭയിലെ വിവിധ ഭാഗങ്ങളിൽ റോഡ് റീ ടാറിങ് നടത്തിയത്. വേഗത്തിലെത്തുന്ന വാഹനങ്ങൾ കുഴിയിൽവീണ് അഴുക്കു വെള്ളവും കല്ലുകളും തെറിച്ച് സ്കൂൾ വിദ്യാർഥികളുൾപ്പെടെയുള്ള കാൽനടക്കാർ ചളിയിൽ കുളിക്കുന്നതും പരിക്കേൽക്കുന്നതും പതിവായിട്ടുണ്ട്. ഇരുചക്ര വാഹനങ്ങളും കുഴിയിൽ വീണ് അപകടപ്പെടുന്നതും പതിവായിരിക്കയാണ്. നിർമാണം കഴിഞ്ഞ് മാസങ്ങൾ മാത്രം കഴിഞ്ഞ റോഡ് തകര്‍ന്നത് പ്രതിഷേധത്തിനിടയാക്കിയിട്ടുണ്ട്.