യുവതിക്ക് അശ്ലീലചിത്രങ്ങളയച്ചയാൾ​ അറസ്​റ്റിൽ

മാനന്തവാടി: ഫേസ്ബുക്ക് വഴി ഭർതൃമതിയായ യുവതിക്ക് അശ്ലീലചിത്രങ്ങൾ അയച്ച യുവാവിനെ പനമരം പൊലീസ് അറസ്റ്റ് ചെയ്തു. കെല്ലൂർ അഞ്ചാംമൈൽ ഉപ്പിവീട്ടിൽ മനാഫിനെയാണ് (28) ജില്ല പൊലീസ് മേധാവിയുടെ നിർദേശപ്രകാരം അറസ്റ്റ് ചെയ്തത്. മാനന്തവാടി കോടതിയിൽ ഹാജരാക്കിയ പ്രതിക്ക് കോടതി ജാമ്യം അനുവദിച്ചു. രണ്ട് വർഷം മുമ്പാണ് കേസിനാസ്പദമായ സംഭവം. അയൽവാസിയും ഭർതൃമതിയുമായ യുവതിയുടെ ഫോണിലേക്കും േഫസ്ബുക്ക് അക്കൗണ്ടിലേക്കും അശ്ലീലചിത്രങ്ങൾ അയക്കുകയായിരുന്നു. യുവതി പൊലീസിൽ പരാതിപ്പെടുകയും മജിസ്ട്രേറ്റ് മുമ്പാകെ മൊഴി നൽകുകയും ചെയ്തിരുന്നു. എന്നാൽ, വിദേശത്തേക്ക് കടന്ന മനാഫിനെ പിടികൂടാൻ കഴിഞ്ഞില്ല. ഇക്കാര്യം ചൂണ്ടിക്കാട്ടി യുവതി ജില്ല പൊലീസ് മേധാവി രാജ്പാൽ മീണക്ക് വീണ്ടും പരാതി നൽകിയതിനെതുടർന്ന് മനാഫ് നാട്ടിലെത്തിയപ്പോൾ അറസ്റ്റ് ചെയ്യുകയായിരുന്നു.