മാർക്കറ്റ് സ്തംഭിച്ചു;- -കല്ലാച്ചി മത്സ്യ മാർക്കറ്റിൽ യൂത്ത്‌ ലീഗ്‌^എസ്‌.ടി.യു അനിശ്ചിതകാല സമരം തുടങ്ങി

മാർക്കറ്റ് സ്തംഭിച്ചു;- -കല്ലാച്ചി മത്സ്യ മാർക്കറ്റിൽ യൂത്ത്‌ ലീഗ്‌-എസ്‌.ടി.യു അനിശ്ചിതകാല സമരം തുടങ്ങി നാദാപുരം: കല്ലാച്ചി മത്സ്യ മാർക്കറ്റിലെ കോഴി സ്റ്റാളുകൾ കേന്ദ്രീകരിച്ച്‌ ഡി.വൈ.എഫ്‌.ഐ നടത്തുന്ന അന്യായ സമരത്തിൽ പ്രതിഷേധിച്ച്‌ യൂത്ത്‌ ലീഗ്‌-എസ്‌.ടി.യു സംയുക്തമായി നടത്തുന്ന മാർക്കറ്റ്‌ അനിശ്ചിതകാല സമരം ആരംഭിച്ചു. പുലർച്ചെ അഞ്ചു മുതൽ യൂത്ത്‌ ലീഗ്‌, എസ്‌.ടി.യു പ്രവർത്തകർ മാർക്കറ്റിൽ എത്തി സമരത്തിൽ അണിചേർന്നു. അനിശ്ചിതകാല സമരം യൂത്ത്‌ ലീഗ്‌ സംസ്ഥാന സെക്രട്ടറി വി.വി. മുഹമ്മദലി ഉദ്ഘാടനം ചെയ്തു. മണ്ഡലം യൂത്ത്‌ ലീഗ്‌ ജനറൽ സെക്രട്ടറി സി.കെ. നാസർ അധ്യക്ഷത വഹിച്ചു. എം.പി. സൂപ്പി, സി.വി. കുഞ്ഞികൃഷ്ണൻ, കെ.എം. രഘുനാഥ്‌, മണ്ടോടി ബഷീർ, കെ.കെ.സി. ജാഫർ, എം.സി. സുബൈർ, ചാലിൽ ഹസൻ, നാസർ കുന്നുമ്മൽ, വി.പി. ഫൈസൽ, പൊയിക്കര അഷ്റഫ്‌, പി.കെ. സമീർ, കോമത്ത്‌ ഹാരിസ്‌, തുണ്ടിയിൽ യൂസുഫ്‌, പി. ആസിഫ്‌, ടി.പി. നൗഫൽ എന്നിവർ സംസാരിച്ചു. മുസ്തഫ കുന്നുമ്മൽ സ്വാഗതവും സി.വി.കെ. അഷ്‌റഫ്‌ നന്ദിയും പറഞ്ഞു. സർക്കാർ നിശ്ചയിച്ചതിനെക്കാൾ കൂടുതൽ വിലക്ക് കോഴി വിൽപന നടത്താൻ അനുവദിക്കില്ലെന്നു പറഞ്ഞാണ് നേരത്തേ ഡി.വൈ.എഫ്.ഐ പ്രവർത്തകർ കോഴി സ്റ്റാളുകൾ അടപ്പിച്ചത്. എന്നാൽ, സമീപ പ്രദേശങ്ങളിലെ മാർക്കറ്റുകളിലൊന്നും സമരം നടത്താതെ കല്ലാച്ചിയിൽ മാത്രം ഡി.വൈ.എഫ്.ഐ സമരം നടത്തുന്നത് ഗൂഢാലോചനയുടെ ഭാഗമാണെന്നു പറഞ്ഞാണ് എസ്.ടി.യു-യൂത്ത് ലീഗ് പ്രവർത്തകർ രംഗത്തിറങ്ങി മത്സ്യ-മാംസ വിൽപനയടക്കം നിർത്തിവെപ്പിച്ച് മാർക്കറ്റിൽ അനിശ്ചിതകാല ബന്ദ് പ്രഖ്യാപിച്ചത്.