മലബാർ റിവർ ഫെസ്​റ്റിന് ഇന്ന് മീൻതുള്ളിപ്പാറയിൽ തുടക്കം

കോഴിക്കോട്: മലബാർ റിവർ ഫെസ്റ്റിനോടനുബന്ധിച്ച് വിനോദസഞ്ചാര വകുപ്പ് ഒരുക്കുന്ന അഞ്ചാമത് അന്താരാഷ്ട്ര വൈറ്റ് വാട്ടർ കയാക്കിങ് ചാമ്പ്യൻഷിപ്പിന് വ്യാഴാഴ്ച ചക്കിട്ടപാറ മീൻതുള്ളിപ്പാറയിൽ തുടക്കം. ഇന്ന് ഫ്രീസ്റ്റൈൽ കയാക്കിങ് മത്സരങ്ങൾ രാവിലെ 9.30ന് ജില്ല പഞ്ചായത്ത് പ്രസിഡൻറ് ബാബു പറശ്ശേരി ഫ്ലാഗ്ഓഫ് ചെയ്യും. ഇൗമാസം 23 വരെ നടക്കുന്ന ചാമ്പ്യൻഷിപ്പി​െൻറ ഉദ്ഘാടനം 21ന് കോടഞ്ചേരി പുലിക്കയത്ത് ഇന്ത്യൻ വോളിബാൾ ടീം മുൻ ക്യാപ്റ്റൻ ടോം ജോസഫ് നിർവഹിക്കും. ഇന്ത്യൻ താരങ്ങൾക്കു പുറമെ അമേരിക്ക, യു.കെ, ഇറ്റലി, സ്പെയിൻ, അയർലൻഡ്, ന്യൂസിലൻഡ്, നേപ്പാൾ, മോണ്ടിനെേഗ്രാ, ഫ്രാൻസ്, ഒാസ്ട്രിയ എന്നീ രാജ്യങ്ങളിൽനിന്നുള്ള താരങ്ങളും ചാമ്പ്യൻഷിപ്പിൽ പങ്കെടുക്കും. കോടഞ്ചേരിയിലെ ചാലിപ്പുഴ, തിരുവമ്പാടിയിലെ ഇരുവഴിഞ്ഞിപ്പുഴ, ചക്കിട്ടപാറ കുറ്റ്യാടിപ്പുഴയിലെ മീൻതുള്ളിപ്പാറ എന്നിവിടങ്ങളിലാണ് മത്സരം.