പ്രധാനമന്ത്രിയുടെ 15 ഇന പരിപാടി: ജില്ലതല സമിതി പുനഃസംഘടിപ്പിക്കുമെന്ന്​

പ്രധാനമന്ത്രിയുടെ 15 ഇന പരിപാടി: ജില്ലതല സമിതി പുനഃസംഘടിപ്പിക്കുമെന്ന് കോഴിക്കോട്: പ്രധാനമന്ത്രിയുടെ 15 ഇന പരിപാടിയുമായി ബന്ധപ്പെട്ട ജില്ലതല സമിതി പുനഃസംഘടിപ്പിക്കാൻ ദേശീയ ന്യൂനപക്ഷ കമീഷൻ വൈസ് ചെയർമാൻ ജോർജ് കുര്യ​െൻറ നേതൃത്വത്തിൽ കോഴിക്കോട് ഗസ്റ്റ് ഹൗസിൽ ചേർന്ന യോഗം തീരുമാനിച്ചു. ജില്ല കലക്ടർ യു.വി ജോസ് അധ്യക്ഷത വഹിച്ചു. പ്രധാനമന്ത്രിയുടെ 15 ഇന പരിപാടി കാര്യക്ഷമമായി നടപ്പാക്കാനും തീരുമാനിച്ചു. കലക്ടർ ചെയർമാനായ സമിതിയിൽ ജില്ലയിലെ എം.പിമാരും എം.എൽ.എമാരും ഉൾപ്പെടും. പഞ്ചായത്ത് രാജ് സ്ഥാപനങ്ങളിലെ പ്രതിനിധികളും പേരെടുത്ത ന്യൂനപക്ഷ സ്ഥാപനങ്ങളെ പ്രതിനിധാനം ചെയ്ത് മൂന്നുപേരും സമിതിയിലുണ്ടാവും. മദ്റസകളുടെ ആധുനികവത്കരണം പ്രാധാന്യത്തോടെ നടപ്പാക്കാനും യോഗം തീരുമാനിച്ചു. 'ഉസ്താദ്' പോലെ ന്യൂനപക്ഷ വിദ്യാർഥികൾക്കായുള്ള പരിശീലന പരിപാടി നടപ്പിലാക്കാൻ നടപടി സ്വീകരിക്കും.