സൗഹൃദ ഫുട്ബാള്‍: വ്യാപാരികള്‍ ജേതാക്കള്‍

മുക്കം: വൃക്കരോഗികളുടെ സഹായത്തിനായി മുക്കത്തെ മാധ്യമപ്രവര്‍ത്തകരും വ്യാപാരികളും തമ്മില്‍ നടന്ന സൗഹൃദ ഫുട്ബാള്‍ മത്സരത്തില്‍ വ്യാപാരി വ്യവസായി ഏകോപന സമിതി യൂത്ത്വിങ് ടീം ജേതാക്കളായി. വാശിയേറിയ മത്സരത്തില്‍ ഒന്നിനെതിരെ രണ്ടു ഗോളുകള്‍ക്കാണ് യൂത്ത് വിങ്ങിന്‍െറ വിജയം. മുരിങ്ങംപുറായി പഞ്ചായത്ത് സ്റ്റേഡിയത്തിലാണ് കളി നടന്നത്. ഇരു വൃക്കകളും തകരാറിലായി ചികിത്സയില്‍ കഴിയുന്ന മുക്കത്തെ ഓട്ടോഡ്രൈവര്‍ നാസര്‍ ഒളകര, മുക്കത്തെ കടയിലെ ജീവനക്കാരനായിരുന്ന ബിജീഷ് എന്നിവരുടെ ചികിത്സക്ക് പണം കണ്ടത്തെുന്നതിനായാണ് മത്സരം സംഘടിപ്പിച്ചത്. വിജയികള്‍ക്കുള്ള ട്രോഫി യൂത്ത്വിങ് പ്രസിഡന്‍റ് റിയാസ് സ്പാര്‍ക്കിളും റണ്ണേഴ്സിനുള്ള ട്രോഫി പ്രസ് ഫോറം പ്രസിഡന്‍റ് എ.പി. മുരളീധരനും നല്‍കി. കളിയില്‍നിന്ന് ലഭിച്ച തുക കെ.വി.വി.ഇ.എസ് മുക്കം യൂനിറ്റ് പ്രസിഡന്‍റ് കെ.സി. നൗഷാദ് ചികിത്സാസഹായത്തിനായി കൈമാറി.