--അഴിത്തല ഫിഷ്​ ലാൻഡിങ് സെൻറർ പദ്ധതി കടലെടുക്കുമോ?

*ജില്ലയിൽ 20ൽപരം ഫിഷ് ലാൻഡിങ് സ​െൻറർ ഉണ്ടായിരിക്കെ അഴിത്തലയിൽ വേണ്ടതുണ്ടോ എന്ന പരിശോധനയിൽ അധികൃതർ വടകര: അഴിത്തല ഫിഷ് ലാൻഡിങ് സ​െൻറർ പദ്ധതി ഉപേക്ഷിക്കാനുള്ള നീക്കം നടക്കുന്നതായി ആക്ഷേപം. ഏറെക്കാലത്തെ മുറവിളിക്കുശേഷം അനുകൂലമായ നീക്കം വടകര നഗരസഭയുടെ ഭാഗത്തുനിന്നുണ്ടായ പുതിയ സാഹചര്യത്തിലാണ് പദ്ധതി ഉപേക്ഷിക്കാനുള്ള നീക്കം നടക്കുന്നത്. തൊട്ടടുത്തുള്ള വിനോദസഞ്ചാരകേന്ദ്രമായ സാൻഡ്ബാങ്ക്സിന് സ​െൻറർ ഭീഷണിയാവുമെന്ന് ചൂണ്ടിക്കാണിച്ചാണ് നിർമാണ പ്രവൃത്തി തടസ്സപ്പെടുത്താൻ ശ്രമിക്കുന്നതത്രെ. ജില്ലയിൽ 20ൽപരം ഫിഷ് ലാൻഡിങ് സ​െൻറർ ഉണ്ടായിരിക്കെ അഴിത്തലയിൽ വേണ്ടതുണ്ടോ എന്ന് പരിശോധിക്കണമെന്നാവശ്യപ്പെട്ട് ഫിഷറീസ് ഡയറക്ടർ പ്രിൻസിപ്പൽ സെക്രട്ടറിക്ക് കത്ത് നൽകിയിരിക്കുകയാണിപ്പോൾ. ഇത് പദ്ധതിയെ അട്ടിമറിക്കാനുള്ള ശ്രമത്തി​െൻറ ഭാഗമാണെന്നാണ് ടൗൺ മുസ്ലിം ലീഗ് കമ്മിറ്റിയുൾപ്പെടെയുള്ള സംഘടനകളുടെ ആരോപണം. 14 വർഷം മുമ്പ് നഗരസഭയുണ്ടാക്കിയ ഫിഷ് ലാൻഡിങ് സ​െൻററിന് മത്സ്യത്തൊഴിലാളികളും നാട്ടുകാരും പണം സംഭാവനയായി നൽകിയാണ് 50 സ​െൻറ് ഭൂമി വാങ്ങി അത്യാവശ്യസൗകര്യങ്ങൾ ഉണ്ടാക്കിയത്. എന്നാൽ, വള്ളം അടുപ്പിക്കാൻ സൗകര്യമില്ലാത്തതുകൊണ്ട് സ​െൻറർ ഉപയോഗിക്കാനാവുന്നില്ല. അടുത്ത കാലത്തായി നഗരസഭയുടെയും സംസ്ഥാന സർക്കാറി​െൻറയും ഫണ്ട് ഉപയോഗിച്ച് നിലം കോൺക്രീറ്റ് ചെയ്യുന്നതുൾപ്പെടെ പണി നടത്തിയിരുന്നു. കഴിഞ്ഞ സർക്കാറി​െൻറ ബജറ്റിൽ അനുവദിച്ച ഒന്നേമുക്കാൽ കോടി രൂപ ഉപയോഗിച്ച് ബാക്കിയുള്ള പ്രവൃത്തി നടത്താനിരിക്കെയാണ് സ​െൻററിനെതിരെ അധികൃതർ നീങ്ങുന്നത്. അഴിത്തല കടവ് കേന്ദ്രീകരിച്ച് ദിവസം നൂറിൽപരം വള്ളങ്ങളാണ് കടലിൽ പോകുന്നത്. ഈ കടവിലേക്ക് വാഹനസൗകര്യമില്ലാത്തതുകൊണ്ട് മത്സ്യം കയറ്റിഅയക്കാൻ റോഡ് വരെ തലച്ചുമടായി കൊണ്ടുവരുകയാണിപ്പോൾ. ഇത് വള്ളക്കാർക്കും കച്ചവടക്കാർക്കും പ്രയാസം സൃഷ്ടിക്കുകയാണ്. നിർദിഷ്ട ഫിഷ് ലാൻഡിങ് സ​െൻററിലേക്ക് റോഡ് പണിതതുകൊണ്ട് ഈ പ്രശ്നത്തിന് പരിഹാരമാകും. ചുറ്റുമതിൽക്കെട്ടുള്ള സ​െൻററിൽ ഉപകരണങ്ങളും വള്ളങ്ങളുമെല്ലാം സുരക്ഷിതമായി സൂക്ഷിക്കാനും കഴിയും. നഗരസഭ പ്രദേശത്തെ മത്സ്യത്തൊഴിലാളികൾ വർഷങ്ങളായി കാത്തിരിക്കുന്ന അഴിത്തല ഫിഷ് ലാൻഡിങ് സ​െൻറർ പദ്ധതി ഉപേക്ഷിക്കാനുള്ള നീക്കത്തിനെതിരെ മത്സ്യത്തൊഴിലാളികളിൽനിന്ന് കടുത്ത പ്രതിഷേധമാണുയരുന്നത്. കഴിഞ്ഞ ദിവസം നടന്ന നഗരസഭ കൗൺസിൽ യോഗത്തിൽ അഴിത്തല ഫിഷ് ലാൻഡിങ് സ​െൻററി​െൻറ പ്രവൃത്തി നിലച്ച സാഹചര്യത്തിൽ മതിയായ ഫണ്ട് വകയിരുത്തി പ്രവൃത്തി ആരംഭിക്കാനുള്ള നടപടി കൈക്കൊള്ളണമെന്ന ആവശ്യം അടിയന്തര പ്രമേയമായി അവതരിപ്പിച്ചിരുന്നു. വാർഡ് കൗൺസിലർ പി. സഫിയയാണ് പ്രമേയം അവതരിപ്പിച്ചത്. ഈ നടപടി ഏറെ ആവേശപൂർവം മത്സ്യത്തൊഴിലാളികൾ നോക്കിനിൽക്കെയാണ് പുതിയ നീക്കം തിരിച്ചടിയാവുന്നത്.