അവർ ഒത്തുചേരുന്നു, സൗഹൃദം പുതുക്കാനും സഹായിക്കാനും

പേരാമ്പ്ര: ഒരു െബഞ്ചിലിരുന്ന് പഠിക്കുകയും പരസ്പരം ഇല്ലായ്മകൾ പങ്കുവെക്കുകയും ചെയ്തവർ വർഷങ്ങൾക്കിപ്പുറത്ത് ഒരുമിക്കുന്നു. 1998 മുതൽ 2001 വരെ ചിന്മയ കോളജിൽ പഠിച്ച വിദ്യാർഥികളാണ് 25ന് പൊൻപറ ഹില്ലിൽ കുടുംബസമേതം ഒത്തുചേരുന്നത്. തങ്ങളുടെ സഹപാഠികളെ സഹായിക്കുന്നതിനുവേണ്ടി കൂടിയാണ് ഈ കൂട്ടായ്മ. സംഗമത്തോടനുബന്ധിച്ച് മൂടാടി ദാമോദരൻ സ്മാരക അവാർഡ് ജേതാവും പൂർവാധ്യാപകനുമായ ടി. റജിയെ ആദരിക്കും. നാടക-ചലച്ചിത്ര നടൻ മുഹമ്മദ് പേരാമ്പ്ര ഉദ്ഘാടനം ചെയ്യും. സാമ്പത്തിക പരാധീനതയനുഭവിക്കുന്ന സഹപാഠികളെ സഹായിക്കാനുള്ള പ്രവർത്തനങ്ങൾക്കും പൂർവ വിദ്യാർഥി സംഗമം രൂപം നൽകുമെന്ന് ഭാരവാഹികളായ ഇ.സി. സന്ദീപ്, ഷിബു ചെറുക്കാട്, ലത്തീഫ് കാരയാട്, പി.എം. ശോണിമ, പ്രജീഷ് ചെറുവണ്ണൂർ എന്നിവർ വാർത്താസമ്മേളനത്തിൽ അറിയിച്ചു.