പുതിയ തെരുവിൽ പുനർജനിക്കും, ആ കഥകളും കഥാപാത്രങ്ങളും

നവീകരിച്ച മിഠായിത്തെരുവി​െൻറ ഉദ്ഘാടനം ശനിയാഴ്ച കോഴിക്കോട്: ബഷീറും പാത്തുമ്മയും എസ്.കെ. പൊറ്റക്കാടും ഓമഞ്ചിയും പി.എം. താജും അദ്ദേഹത്തി​െൻറ കുടുക്ക നാടകത്തിലെ വിശപ്പും ഉറൂബും ഉമ്മാച്ചുവും താമരയും പിന്നെ കെ.എ. കൊടുങ്ങല്ലൂരും കെ.പി. കേശവമേനോനും പുനത്തിൽ കുഞ്ഞബ്ദുല്ലയും സഞ്ജയനും തിക്കോടിയനുമെല്ലാം ഒരിക്കൽ കൂടി കോഴിക്കോടി​െൻറ പൈതൃകത്തെരുവിൽ പുനർജനിക്കും. മിഠായിത്തെരുവി​െൻറ ഇന്നലെകളെയും ഇന്നിനെയും കുറിച്ച് അവർ പരസ്പരം സംവദിക്കും. ശനിയാഴ്ച നവീകരിച്ച മിഠായിത്തെരുവി​െൻറ ഉദ്ഘാടനം നടക്കുന്ന വേദിയിലാണ് ഈ തെരുവിെന സ്നേഹിച്ച എഴുത്തുകാരും അവരുെട തൂലികയിലൂടെ അനശ്വരരായ കഥാപാത്രങ്ങളും രംഗാവിഷ്കാരവുമായി എത്തുന്നത്. തെരുവിൽനിന്നുതന്നെ വേഷവും ചായവുമണിഞ്ഞാണ് ഇവരെത്തുക. തങ്ങളുടെ എഴുത്തുകാലത്തെ തെരുവി​െൻറ കഥയാണ് ഇവരോരോരുത്തരും കാഴ്ചക്കാരുമായി പങ്കുവെക്കുക. തെരുവി​െൻറ മധുരമായ ഹൽവ കഷ്ണവും അവർ പങ്കുവെക്കും. ഒടുവിൽ 'നവീകരണം തെരുവിൽമാത്രം മതിയോ, മനുഷ്യമനസ്സുകളിലും വേണ്ടേ' എന്ന ചോദ്യമുയർത്തി ആവിഷ്കാരം അവസാനിക്കുന്നു. ജില്ല ഭരണകൂടത്തിനു വേണ്ടി കോ‍ഴിക്കോട് നാടകഗ്രാമത്തിലെ കലാകാരന്മാരാണ് മലയാളത്തി​െൻറ പ്രിയ എഴുത്തുകാരും കഥാപാത്രങ്ങളുമായി എത്തുന്നത്. 25 മിനിറ്റുള്ള രംഗാവിഷ്കാരം സംവിധാനം ചെയ്തത് നാടകകാരനായ ടി. സുരേഷ് ബാബുവും തിരക്കഥയൊരുക്കിയത് സുധീർ അമ്പലപ്പാടുമാണ്. ബേപ്പൂർ സുൽത്താനുമായി ഏറെ സാദൃശ്യം പുലർത്തുന്ന ബേപ്പൂരുകാരൻതന്നെയായ മണി ബഷീറായി വേഷമിടും, ഉറൂബായെത്തുന്നത് അദ്ദേഹത്തി​െൻറ മകൻ സുധാകരനാണ്. ഹരീഷ് പണിക്കർ പൊറ്റെക്കാടായി വേഷമിടുമ്പോൾ ടി.എൻ. രഘുനാഥ് തിക്കോടിയനാവും. രംഗാവിഷ്കാരത്തി​െൻറ റിഹേഴ്സൽ സംവിധായക​െൻറ നേതൃത്വത്തിൽ ആനക്കുളം സാംസ്കാരിക നിലയത്തിൽ വ്യാഴാഴ്ച നടന്നു.