ബൈക്കിലെത്തിയ സംഘം വീട്ടമ്മയുടെ മാല കവർന്നു; സിനിമ സ്​റ്റെലിൽ നാട്ടുകാർ പിടികൂടി

മോഷ്ടാക്കളെ നാട്ടുകാർ പിടികൂടിയത് സിനിമ സ്റ്റൈലിൽ ഫറോക്ക്: മകനോടൊപ്പം നടക്കുകയായിരുന്ന വീട്ടമ്മയുടെ സ്വർണമാല ബൈക്കിലെത്തിയ രണ്ടംഗ സംഘം കവർന്നു. വീട്ടമ്മയുടെ നിലവിളി കേട്ട് പിറകെയെത്തിയ കാർ യാത്രക്കാർ സാഹസികമായി ബൈക്കിനെ മൂന്നു കിലോമീറ്ററോളം പിന്തുടർന്ന് ഫറോക്ക് ചന്തയിൽ വെച്ച് ബൈക്കിനെ ഇടിച്ചിടുകയായിരുന്നു. ഓടി രക്ഷപ്പെടാൻ ശ്രമിച്ച ബൈക്ക് യാത്രക്കാരെ നാട്ടുകാർ പിടികൂടി മരത്തിൽ കെട്ടിയിട്ടു. ഇവരിൽ നിന്നും സ്വർണമാലയും കണ്ടടുത്തു. ഫറോക്ക് എസ്.ഐ എ. രമേശ് കുമാർ പ്രതികളെ കസ്റ്റഡിയിലെടുത്തു. ഫാറൂഖ് കോളജ് ചുള്ളിപറമ്പിൽ മുള്ളപ്പുറത്ത് വീട് അനീഷ്‌ കുമാറി​െൻറ ഭാര്യ മിനിയുടെ മൂന്ന് പവൻ താലിമാലയാണ് കവർന്നത്. മണ്ണൂർ ചാമ്പയിൽ വീട്ടിൽ സുബീഷ് (26), മുക്കത്ത് കടവ് പടന്നയിൽ വിട്ടിൽ സുരേഷ് (25) എന്നിവരെയാണ് പൊലിസ് അറസ്റ്റ് ചെയ്തത്. ബൈക്ക് നമ്പർ വായിച്ചെടുക്കാൻ കഴിയാത്ത രൂപത്തിൽ നമ്പർ പ്ലേറ്റിന് മീതെ ത്രിവർണ പതാകയും ഒട്ടിച്ചിരുന്നു. കോടതിയിൽ ഹാജരാക്കിയ ഇരുവരെയും റിമാൻഡ് ചെയ്തു