സ്വർണം പിടികൂടി

കൊണ്ടോട്ടി: കരിപ്പൂർ വിമാനത്താവളത്തിൽ നമസ്കാരപ്പായക്കുള്ളിൽ ഒളിപ്പിച്ച് കടത്താൻ ശ്രമിച്ച സ്വർണം പിടികൂടി. എയർ കസ്റ്റംസ് ഇൻറലിജൻസാണ് 39.95 ലക്ഷം രൂപ വിലവരുന്ന സ്വർണം പിടികൂടിയത്. രണ്ട് കാസർകോട് സ്വദേശികൾ പിടിയിലായി. ഇരുവരിൽ നിന്നായി 1.369 കിലോഗ്രാം സ്വർണമാണ് കണ്ടെടുത്തത്. കാസർകോട് നെല്ലിക്കാപ്പറ്റ സ്വദേശി സക്കീർ ഹുസൈൻ (27), മൊഗ്രാൽ പുത്തൂർ സ്വദേശി മുഹമ്മദ് ഹാഷിം അബ്ദുല്ല (24) എന്നിവരെയാണ് പിടികൂടിയത്. ബുധനാഴ്ച രാവിലെ ദുബൈയിൽ നിന്നുള്ള എയർ ഇന്ത്യ എക്സ്പ്രസ് വിമാനത്തിലാണ് കരിപ്പൂരിെലത്തിയത്. ബാഗേജിനകത്ത് നമസ്കാരപ്പായക്കുള്ളിൽ ഷീറ്റി​െൻറ രൂപത്തിലാക്കിയാണ് സ്വർണം ഒളിപ്പിച്ചിരുന്നത്. മുഹമ്മദ് ഹാഷിം അബ്ദുല്ലയിൽനിന്ന് 20 ലക്ഷം രൂപയുടെ 688 ഗ്രാമും സക്കീർ ഹുസൈനിൽനിന്ന് 19.95 ലക്ഷം രൂപയുടെ 681 ഗ്രാം സ്വർണവുമാണ് പിടികൂടിയത്. അസി. കമീഷണർമാരായ എം.സി. രാജേന്ദ്രബാബു, ഡി.എൻ. പന്ത്, സൂപ്രണ്ടുമാരായ പി.കെ. ഷാനവാസ്, എസ്.വി.എം അഷ്റഫ്, ഇൻസ്പെക്ടർമാരായ അസീബ് ചേന്നാട്ട്, കപിൽ സുരൈറ, സത്യമേന്ദ്ര എന്നിവരടങ്ങിയ സംഘമാണ് സ്വർണം പിടികൂടിയത്.