ടാഗോർഹാൾ കലാപരിപാടികൾക്ക് മാത്രം വിട്ടുനൽകണം

കോഴിക്കോട്: സംഗീതനഗരമായ കോഴിക്കോട്ട് കോർപറേഷനുകീഴിൽ പ്രവർത്തിക്കുന്ന ഹാളുകളുടെ ശോച്യാവസ്ഥ ഉടൻ പരിഹരിക്കണമെന്നും ടാഗോർഹാൾ കല്യാണ ആവശ്യങ്ങൾക്കും മറ്റും നൽകാതെ കലാപരിപാടികൾക്ക് മാത്രം പരിമിതപ്പെടുത്തണമെന്നും മ്യൂസിക് ആർട്ടിസ്റ്റ്സ് അസോസിയേഷൻ (മാ) വാർഷിക ജനറൽ ബോഡി യോഗം ആവശ്യപ്പെട്ടു. പ്രസിഡൻറ് കെ. സലാമി​െൻറ അധ്യക്ഷതയിൽ ചേർന്ന യോഗത്തിൽ പപ്പൻ കോഴിക്കോട്, സുനിൽകുമാർ, ലീന പപ്പൻ, വിത്സൻ സാമുവൽ, എൽ. രഘു, കളരിക്കൽ രാജൻ, എം.എ. റഹ്മാൻ, പ്രദീപ്, ആസിഫ് എന്നിവർ സംസാരിച്ചു. മണികണ്ഠൻ തറാൽ സ്വാഗതം പറഞ്ഞു. ഭാരവാഹികൾ: കെ.സലാം (പ്രസി.), ആർ.എൻ. ജയദേവൻ (സെക്ര.), എം. ഹരിദാസ്(ട്രഷ.).