ഒളവണ്ണയിൽ അർഹതയില്ലാത്തവർ മുൻഗണന പട്ടികയിൽ

കോഴിക്കോട്: താലൂക്ക് സപ്ലൈ ഓഫിസറും റേഷനിങ് ഇൻസ്പെക്ടർമാരും ഒളവണ്ണ പഞ്ചായത്തിലെ പാലാഴിയിൽ നടത്തിയ പരിശോധനയിൽ മുൻഗണന കാർഡിന് അർഹതയില്ലാത്തവരെ കണ്ടെത്തി. നാലുചക്രവാഹനമുള്ളവരും 1000 ചതുരശ്ര അടിയിൽ കൂടുതലുള്ള ഇരുനില വീട് സ്വന്തമായിട്ടുള്ളവരുമായ ഒമ്പത് കുടുംബങ്ങളാണ് സർക്കാർ സൗജന്യമായി നൽകുന്ന മുൻഗണന റേഷൻ കൈപ്പറ്റുന്നതായി കണ്ടെത്തിയത്. ഇവർക്കെതിരെ ശിക്ഷണ നടപടികൾ സ്വീകരിക്കുന്നതിനായി കലക്ടർക്ക് ശിപാർശ ചെയ്തു. താലൂക്ക് സപ്ലൈ ഓഫിസർ വി.എം. ജയകുമാർ, റേഷനിങ് ഇൻസ്പെക്ടർമാരായ യു.വി. അബ്ദുൽഖാദർ, കെ. സുധീർ, എസ്. ലളിതാഭായ് എന്നിവർ പരിശോധനയിൽ പങ്കെടുത്തു.