കോഴിക്കോട്ട് സാമൂഹിക സുരക്ഷാ പെന്‍ഷന്‍ സര്‍വേ പൂര്‍ത്തീകരണത്തിലേക്ക്

കോഴിക്കോട്: സാമൂഹിക സുരക്ഷാ പെന്‍ഷന്‍ പരമാവധി ഗുണഭോക്താക്കളില്‍ സമയബന്ധിതമായി എത്തിക്കുക എന്ന ലക്ഷ്യത്തോടെ സംസ്ഥാന സര്‍ക്കാര്‍ കുടുംബശ്രീ വഴി നടപ്പാക്കിയ സാമൂഹികസുരക്ഷാ പെന്‍ഷന്‍ സര്‍വേ കോഴിക്കോട് കോര്‍പറേഷനില്‍ 98 ശതമാനം പൂര്‍ത്തീകരിച്ചു. വാര്‍ധക്യകാല പെന്‍ഷന്‍, കാര്‍ഷിക പെന്‍ഷന്‍, വികലാംഗ പെന്‍ഷന്‍, വിധവാ പെന്‍ഷന്‍, അവിവാഹിത പെന്‍ഷന്‍ തുടങ്ങി നഗരസഭയില്‍ നിലവില്‍ വാങ്ങിക്കൊണ്ടിരിക്കുന്ന 46782 പെന്‍ഷന്‍കാരിലാണ് സര്‍വേ നടത്തിയത്. കുടുംബശ്രീ എ.ഡി.എസ് മുഖാന്തരം കുടുംബശ്രീക്ക് കീഴിലെ തെരഞ്ഞെടുക്കപ്പെട്ട 150 എന്യൂമറേറ്റര്‍മാര്‍ രണ്ടു മാസമെടുത്താണ് 75 വാര്‍ഡുകളിലായി സര്‍വേ നടത്തിയത്. കുടുംബശ്രീ പരിശീലന സ്ഥാപനമായ ഏക്സാത്താണ് മേല്‍നോട്ടം വഹിച്ചത്.