ബാലുശ്ശേരി സര്‍ക്കിളിന്‍െറ നേതൃത്വത്തില്‍ ‘സെയ്ഫ് റെയ്ഡ്’

ബാലുശ്ശേരി: കേരള സര്‍ക്കാറിന്‍െറ ശുഭയാത്ര പദ്ധതിയുടെ ഭാഗമായി ബാലുശ്ശേരി പൊലീസ് സര്‍ക്കിളില്‍ വിദ്യാര്‍ഥികളുടെ പങ്കാളിത്തത്തോടെ ‘സെയ്ഫ് റെയ്ഡ്’ പരിപാടി നടത്തി. ബാലുശ്ശേരി പൊലീസ് സ്റ്റേഷന്‍ ഹാളില്‍ നടന്ന പരിപാടി താമരശ്ശേരി ഡിവൈ.എസ്.പി കെ. അഷ്റഫ് ഉദ്ഘാടനം ചെയ്തു. ബാലുശ്ശേരി സി.ഐ കെ. സുഷീര്‍ അധ്യക്ഷതവഹിച്ചു. ശാരീരിക ആഘാതങ്ങളെക്കുറിച്ച് ന്യൂറോ സര്‍ജന്‍ ഡോ. നൗഫല്‍ ബഷീര്‍, ട്രാഫിക് നിയമങ്ങളെക്കുറിച്ച് ക്രൈംബ്രാഞ്ച് ഡിവൈ.എസ്.പി ജെയ്സന്‍ കെ. എബ്രഹാം എന്നിവര്‍ ക്ളാസെടുത്തു. എസ്.ഐ വി. സിജിത് സ്വാഗതവും സീനിയര്‍ സി.പി.ഒ സി.കെ. സുജിത് നന്ദിയും പറഞ്ഞു. വൈകീട്ട് പൊലീസ് ഉദ്യോഗസ്ഥര്‍, സന്നദ്ധ സംഘടനാ പ്രവര്‍ത്തകര്‍, മാധ്യമ പ്രവര്‍ത്തകര്‍, ഡ്രൈവിങ് ലൈസന്‍സുള്ള വിദ്യാര്‍ഥികള്‍ എന്നിവര്‍ പങ്കെടുത്തുകൊണ്ട് കരുമലയില്‍നിന്ന് ബാലുശ്ശേരിയിലേക്ക് മോട്ടോര്‍ സൈക്കിള്‍ സെയ്ഫ് റെയ്ഡും നടന്നു. സൈക്കിള്‍ റെയ്ഡ് മികച്ച ഡ്രൈവര്‍ക്കുള്ള അവാര്‍ഡ് ലഭിച്ച കെ. അശോകന്‍ ഫ്ളാഗ് ഓഫ് ചെയ്തു. ബാലുശ്ശേരി ബസ്സ്റ്റാന്‍ഡ് പരിസരത്ത് നടന്ന സമാപന ചടങ്ങില്‍ ചിത്രരചനാ കൂട്ടായ്മയും നടന്നു. കൂട്ടായ്മ സാഹിത്യകാരന്‍ ഡോ. കെ. ശ്രീകുമാര്‍ ഉദ്ഘാടനം ചെയ്തു.