ജില്ലാ സ്കൂള്‍ നീന്തല്‍ ചാമ്പ്യന്‍ഷിപ് : കോടഞ്ചേരി സെന്‍റ് ജോസഫ്സ് സ്കൂളിന് ഓവറോള്‍

കോഴിക്കോട്: നടക്കാവ് സ്പോര്‍ട്സ് കൗണ്‍സില്‍ സ്വിമ്മിങ് പൂളില്‍ നടന്ന ജില്ലാ സ്കൂള്‍ നീന്തല്‍ ചാമ്പ്യന്‍ഷിപ്പില്‍ 114 പോയന്‍റുമായി കോടഞ്ചേരി സെന്‍റ് ജോസഫ്സ് സ്കൂള്‍ ഓവറോള്‍ കിരീടം നേടി. 40 പോയന്‍റുമായി കോഴിക്കോട് സെന്‍റ് ജോസഫ്സ് ബോയ്സ് ഹൈസ്കൂള്‍ റണ്ണറപ്പായി. 36 പോയന്‍റുമായി മാവൂര്‍ ജി.എച്ച്.എസ്.എസിനാണ് മൂന്നാം സ്ഥാനം. ഉപജില്ലാ അടിസ്ഥാനത്തില്‍ 240 പോയന്‍റുമായി കോഴിക്കോട് സിറ്റിക്കാണ് ഓവറോള്‍. 150 പോയന്‍റുമായി താമരശ്ശേരി ഉപജില്ല രണ്ടാം സ്ഥാനവും 74 പോയന്‍റുമായി മുക്കം ഉപജില്ല മൂന്നാം സ്ഥാനവും നേടി. വര്‍ഷങ്ങള്‍ക്കു ശേഷമാണ് മലയോര മേഖലയിലെ ആധിപത്യം തകര്‍ത്ത് കോഴിക്കോട് സിറ്റി ഉപജില്ല കിരീടമണിയുന്നത്. സ്കൂള്‍ വിഭാഗത്തില്‍ 17 ഉപജില്ലകളില്‍ നിന്നായി ആയിരത്തോളം വിദ്യാര്‍ഥികളാണ് മത്സരത്തില്‍ പങ്കെടുത്തത്. 24 മുതല്‍ 27 വരെ തൃശൂരില്‍ നടക്കുന്ന സംസ്ഥാന സ്കൂള്‍ നീന്തല്‍ മത്സരത്തില്‍ പങ്കെടുക്കേണ്ട ജില്ലാ സ്കൂള്‍ ടീമിനെ ഈ മത്സരത്തില്‍ നിന്നാണ് തെരഞ്ഞെടുക്കുക.