ആദ്യ ബാങ്ക് അവധിയില്‍ നിരാശ്രയരായി ജനം

കോഴിക്കോട്: നോട്ടുമാറ്റം രണ്ടാഴ്ച പിന്നിടുമ്പോഴും പ്രതിസന്ധി തീരാതെ നാടും നഗരവും. ആയിരം, അഞ്ഞൂറ് നോട്ടുകള്‍ പിന്‍വലിച്ചശേഷം ആദ്യമായി ഞായറാഴ്ച ബാങ്കുകള്‍ അടഞ്ഞുകിടന്നപ്പോള്‍ പണത്തിനായി ആളുകള്‍ പരക്കം പാഞ്ഞു. എല്ലാ ദിവസവും ബാങ്കുകള്‍ക്ക് മുന്നില്‍ ക്യൂവായിരുന്നു ആശ്രയമെങ്കിലും ഞായറാഴ്ച ഒരാശ്രയവുമില്ലാത്തവരായി ജനം മാറി. നഗരത്തിലെ എ.ടി.എമ്മുകളില്‍ മാത്രമാണ് അല്‍പമെങ്കിലും പണം ലഭിച്ചത്. പണമുള്ളവയില്‍തന്നെ രണ്ടായിരം രൂപയുടെ നോട്ടുകള്‍ മാത്രമാണ് ലഭിച്ചത്. ഇത് മാറാനും ഞായറാഴ്ച വഴിയില്ലായിരുന്നു. ഗ്രാമപ്രദേശങ്ങളില്‍ മിക്ക എ.ടി.എമ്മുകളും പൂര്‍ണമായി പണിമുടക്കി. സര്‍ക്കാര്‍ ജീവനക്കാര്‍ അടക്കമുള്ളവര്‍ ഈ മാസത്തെ ശമ്പളം എടുക്കാന്‍ കഴിയാതെയിരിക്കുമ്പോഴാണ് ഞായറാഴ്ചയും ബാങ്കുകള്‍ക്ക് അവധിയായത്. മാസാവസാനമാകുന്നതോടെ ജീവനക്കാര്‍ അടക്കമുള്ളവര്‍ കൂടുതല്‍ സാമ്പത്തിക പ്രതിസന്ധിയിലേക്ക് നീങ്ങും. നോട്ടുകുരുക്ക് മൂന്നാമത്തെ ആഴ്ചയിലേക്ക് നീങ്ങുമ്പോള്‍ പ്രതിസന്ധി കൂടുതല്‍ രൂക്ഷമാവുമെന്ന് ബാങ്കിങ് രംഗത്തുള്ളവര്‍ ചൂണ്ടിക്കാട്ടുന്നു. ബാങ്കുകള്‍ക്ക് മുന്നില്‍ പല ദിവസം കാത്തുനിന്ന് മടുത്ത പലരും ഇനി ബാങ്കുകളെ ആശ്രയിക്കുന്നത് നിര്‍ത്തിയേക്കും. പലരും ജോലി മാറ്റിവെച്ചാണ് ബാങ്കില്‍ എത്തുന്നത്. ഇങ്ങനെയുള്ളവര്‍ക്ക് ബാങ്കില്‍നിന്ന് ടോക്കണുമായി മടങ്ങേണ്ട അവസ്ഥയാണ്. അടുത്തദിവസം വീണ്ടും ബാങ്കില്‍ വരേണ്ടി വരും. നോട്ട് മാറല്‍ 4500 ല്‍നിന്ന് രണ്ടായിരമാക്കി കുറച്ചതോടെ വരി നില്‍ക്കാന്‍ പലരും മടിക്കുകയാണ്. വരിനിന്നാലും രണ്ടായിരം രൂപയുടെ പുതിയ നോട്ടാണ് ലഭിക്കുന്നത് എന്നതാണ് കാരണം. ഇതിന്‍െറ ചില്ലറക്ക് വീണ്ടും അലയേണ്ടിവരും. കെ.എസ്.ആര്‍.ടി.സി, കെ.എസ്.ഇ.ബി, മെഡിക്കല്‍ കോളജുകളിലെ ഫാര്‍മസികള്‍ എന്നിവയില്‍ അടക്കം സര്‍ക്കാര്‍ പ്രഖ്യാപനത്തിന് വിരുദ്ധമായി പഴയ നോട്ടുകള്‍ സ്വീകരിക്കാത്തതും പ്രശ്നം സൃഷ്ടിക്കുകയാണ്.