വാഹനാപകടത്തില്‍ ഇക്കൊല്ലം പൊലിഞ്ഞത് 133 ജീവന്‍

കോഴിക്കോട്: നഗരത്തില്‍ വാഹനാപകടത്തില്‍ ഇക്കൊല്ലം ജീവന്‍ നഷ്ടപ്പെട്ടത് 133 പേര്‍ക്ക്. ഇവരെ സ്മരിക്കല്‍ ചടങ്ങ് ട്രോമാകെയര്‍ കോഴിക്കോട് ആഭിമുഖ്യത്തില്‍ 20ന് രാവിലെ 10ന് നടക്കും. ബി.ഇ.എം ഗേള്‍സ് സ്കൂള്‍ ഹാളില്‍ ഗതാഗത മന്ത്രി എ.കെ. ശശീന്ദ്രന്‍ ഉദ്ഘാടനം ചെയ്യും. എല്ലാ നവംബറിലും മൂന്നാം ഞായറാഴ്ച അനുസ്മരണച്ചടങ്ങ് വേണമെന്ന ഐക്യരാഷ്ട്രസഭയുടെ തീരുമാനപ്രകാരമാണ് ഒത്തുകൂടല്‍. മരിച്ചവരുടെയും അപകടത്തിനിരയായവരുടെയും ബന്ധുക്കള്‍ ചടങ്ങിനത്തെും. റോഡപകടങ്ങളെപ്പറ്റി ബോധവത്കരിക്കാനും അപകടത്തില്‍ പെടുന്നവരെ സുരക്ഷിതമായി ആശുപത്രിയിലത്തെിക്കാനും സഹായം നല്‍കുകയാണ് ട്രോമാകെയറിന്‍െറ മുഖ്യ പ്രവര്‍ത്തനം. ജില്ലയില്‍ 302 അപകടമരണമാണ് ഇക്കൊല്ലം നടന്നത്. രാജ്യത്ത് വര്‍ഷം 1.4 ലക്ഷം പേര്‍ റോഡപകടങ്ങളില്‍ മരിക്കുന്നതായി ട്രോമാകെയര്‍ ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ദിവസം 386 പേരും മണിക്കൂറില്‍ 16 പേരും വാഹനാപകടത്തില്‍ മരിക്കുന്നു. ഇതില്‍ 40 ശതമാനം പേരും 25 വയസ്സില്‍ താഴെയുള്ളവരാണ്. അപകടങ്ങള്‍ക്ക് മുഖ്യകാരണം കാര്യക്ഷമമല്ലാത്ത ഡ്രൈവിങ് പരിശീലനമാണെന്ന് വ്യക്തമായതിനാല്‍ മോട്ടോര്‍ ഡ്രൈവിങ് ഇന്‍സ്ട്രക്ടര്‍മാര്‍ക്കായി വിദഗ്ധ പരിശീലനം ആരംഭിച്ചതായും ഭാരവാഹികള്‍ പറഞ്ഞു. പ്രസിഡന്‍റ് ആര്‍. ജയന്ത് കുമാര്‍, പാട്രണ്‍ കെ.ടി. രഘുനാഥ്, ക്യാപ്റ്റന്‍ ദിനകര്‍ കരുണാകര്‍, അഡ്വ. സി.എം. പ്രദീപ് കുമാര്‍, ഇ.ആര്‍. സത്യകൃഷ്ണന്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.