ജിഷക്ക് നീതിലഭിക്കാത്തതില്‍ പ്രതിഷേധം

കോഴിക്കോട്: പെരുമ്പാവൂരില്‍ കൊല്ലപ്പെട്ട ജിഷക്ക് നീതിലഭിക്കാത്തതില്‍ പ്രതിഷേധിച്ച് പെണ്‍കൂട്ടായ്മ സമരംനടത്തി. മാനാഞ്ചിറ കിഡ്സണ്‍ കോര്‍ണറില്‍ വലിയ ഉരുളിയില്‍ പ്രതീകാത്മകമായി ചോരനിറച്ച് അതില്‍ ഇരുന്നുകൊണ്ടായിരുന്നു പ്രതിഷേധം. തെരഞ്ഞെടുപ്പില്‍ നോട്ടക്ക് വോട്ട് ചെയ്യണമെന്ന ആഹ്വാനത്തോടെയാണ് പ്രതിഷേധസമരം ആരംഭിച്ചത്. ജിഷയെ ക്രൂരമായി കൊലപ്പെടുത്തിയ ആളുടെയും അധികാരക്കസേര പങ്കിടുന്നവരുടെയും കാഴ്ചപ്പാട് ഒന്നുതന്നെയാണെന്നും അധികാരത്തിന്‍െറ താഴത്തേട്ടില്‍ നില്‍ക്കുന്നവര്‍ക്കും ദലിതര്‍ക്കും വേണ്ടി ഇത്തവണ സ്ഥാനാര്‍ഥികള്‍ക്ക് വോട്ട് ചെയ്യില്ളെന്നും സമരക്കാര്‍ വ്യക്തമാക്കി. പി. വിജി, എച്ച്. ഗാര്‍ഗി, വീണ, വിമലാ മണി, ജാന്‍സി ജോസ്, ദേവിക, കെ.എം. സുധ തുടങ്ങിയവര്‍ നേതൃത്വം നല്‍കി.