ഹയര്‍ സെക്കന്‍ഡറി: ജില്ലയില്‍ 83.11 ശതമാനം വിജയം

കോഴിക്കോട്: എസ്.എസ്.എല്‍.സിക്കു പിന്നാലെ ഹയര്‍സെക്കന്‍ഡറി പരീക്ഷയിലും ജില്ലയുടെ വിജയശതമാനം കുറഞ്ഞു. 83.11ശതമാനമാണ് ജില്ലയുടെ വിജയം. കഴിഞ്ഞതവണ 87.05 ആയിരുന്നു വിജയശതമാനം. 177 ഹയര്‍സെക്കന്‍ഡറി സ്കൂളുകളിലായി പരീക്ഷയെഴുതിയ 35,337 ല്‍ 29,367 പേര്‍ ഉപരിപഠനത്തിന് യോഗ്യത നേടി. 990പേര്‍ മുഴുവന്‍ വിഷയങ്ങളിലും എ പ്ളസ് നേടി. 5970 പേര്‍ തോറ്റു. അഞ്ച് സ്കൂളുകള്‍ നൂറുമേനി വിജയം നേടി. ടെക്നിക്കല്‍ സ്കൂള്‍ വിഭാഗത്തില്‍ 32.65 ശതമാനമാണ് വിജയം. പരീക്ഷയെഴുതിയ 49ല്‍ 16പേര്‍ ഉപരിപഠനത്തിന് യോഗ്യത നേടി. ഈ വിഭാഗത്തില്‍ ആര്‍ക്കും മുഴുവന്‍ വിഷയങ്ങള്‍ക്ക് എ പ്ളസ് ഇല്ല. ഓപണ്‍ സ്കൂള്‍ വിഭാഗത്തില്‍ 33.38 ശതമാനമാണ് ജയം. പരീക്ഷയെഴുതിയ 8,022ല്‍ 2678പേര്‍ ഉപരിപഠനത്തിന് യോഗ്യത നേടി. 15പേര്‍ എല്ലാ വിഷയങ്ങള്‍ക്കും എ പ്ളസ് നേടി.കോഴിക്കോട് സെന്‍റ് ജോസഫ്സ് ആംഗ്ളോ ഇന്ത്യന്‍ ഗേള്‍സ് (172പേര്‍), കൊളത്തറ കാലിക്കറ്റ് വികലാംഗ വിദ്യാലയം (42പേര്‍), കുട്ടമ്പൂര്‍ എച്ച്.എസ്.എസ് പുന്നശ്ശേരി (29), കോഴിക്കോട് സില്‍വര്‍ ഹില്‍സ് (100), കരുണ എരഞ്ഞിപ്പാലം (22)എന്നിവിടങ്ങളില്‍ പരീക്ഷയെഴുതിയ എല്ലാവരും ജയിച്ചു. മുഴുവന്‍ വിഷയങ്ങള്‍ക്കും എപ്ളസ് നേടിയവരുടെ എണ്ണത്തില്‍ വന്‍ കുറവാണ് ഇത്തവണയുണ്ടായത്. കഴിഞ്ഞവര്‍ഷം 1071പേര്‍ക്ക് ലഭിച്ചിടത്ത് ഇത്തവണ 990 ആയാണ് കുറഞ്ഞത്. ടെക്നിക്കല്‍ സ്കൂള്‍ വിഭാഗത്തിലെ വിജയശതമാനം കുത്തനെ കുറഞ്ഞു. കഴിഞ്ഞവര്‍ഷം 57.89, തൊട്ടു മുമ്പത്തെ വര്‍ഷം 62 എന്നിങ്ങനെയായിരുന്ന സ്ഥാനത്താണ് ഇത്തവണ 32.65 ശതമാനമായത്. ഓപണ്‍ സ്കൂള്‍ വിഭാഗത്തിലും വിജയശതമാനം ഇടിഞ്ഞു. കഴിഞ്ഞ തവണ 38.34, തൊട്ടു മുമ്പത്തെ വര്‍ഷം 41 എന്നിങ്ങനെയായിരുന്നിടത്ത് ഇത്തവണ 33.38 ആയും കുറഞ്ഞു. വിജയശതമാനം കുറഞ്ഞെങ്കിലും സംസ്ഥാന ശരാശരിയായ 80.94 നേക്കാള്‍ മുന്നിലാണ്. വി.എച്ച്.എസ്.ഇ: 82.76 ശതമാനം കോഴിക്കോട്: വി.എച്ച്.എസ്.ഇയില്‍ പാര്‍ട്ട് ഒന്ന്, രണ്ട്, മൂന്ന് വിഭാഗങ്ങളിലായി ജില്ലയിലെ സ്കൂളുകള്‍ നേടിയത് 82.76ശതമാനം ജയം. പരീക്ഷയെഴുതിയ 2459ല്‍ 2035 പേര്‍ ഉപരിപഠനത്തിന് യോഗ്യത നേടി. കഴിഞ്ഞവര്‍ഷം 89.06 ശതമാനമായിരുന്നു ജയം. പാര്‍ട്ട് ഒന്ന്, രണ്ട് വിഭാഗത്തില്‍ 91.46 ശതമാനമാണ് ജയം. 2249പേര്‍ ഉപരിപഠനത്തിന് യോഗ്യത നേടി. കഴിഞ്ഞവര്‍ഷം ഈ വിഭാഗത്തില്‍ 97.06ശതമാനമായിരുന്നു ജയം. ജില്ലയിലെ രണ്ടു പേര്‍എല്ലാ വിഷയങ്ങള്‍ക്കും എ പ്ളസ് നേടി. നടക്കാവ് ജി.വി.എച്ച്.എസ്.എസിലെ കെ.സംഗീത, ജെ.ഡി.ടി വി.എച്ച്.എസ്.എസ് ഗേള്‍സിലെ അപര്‍ണ സുദര്‍ശന്‍ എന്നിവരാണിവര്‍. പാര്‍ട്ട് ഒന്ന്, രണ്ട്, മൂന്ന് വിഭാഗങ്ങളിലായി ഗവ.വി.എച്ച്.എസ്.എസ് പയ്യോളി (90), എം.കെ.എച്ച്.എം.ഒ വി.എച്ച്.എസ്.എസ് മുക്കം (56) എന്നിവര്‍ക്ക് നൂറുമേനിയാണ്. പാര്‍ട്ട് ഒന്ന്, രണ്ട് വിഭാഗങ്ങളിലായി അഞ്ച് സ്കൂളുകള്‍ക്ക് നൂറുമേനിയുണ്ട്. ഫറോക്ക് ഗവ. ഗണപത് വി.എച്ച്.എസ്.എസ് (59), ജി.വി.എച്ച്.എസ്.എസ് ഗേള്‍സ് നടക്കാവ് (88), ഗവ.വി.എച്ച്.എസ്.എസ് പയ്യോളി (90), കാലിക്കറ്റ് ഗേള്‍സ് വി.എച്ച്.എസ്.എസ് (58), എം.കെ.എച്ച്.എം.ഒ വി.എച്ച്.എസ്.എസ് മുക്കം (56) എന്നീ സ്കൂളുകളാണ് ഇവ.