ജയില്‍ മോചിതരായ എസ്.ഐ.ഒ പ്രവര്‍ത്തകര്‍ക്ക് സ്വീകരണം

കോഴിക്കോട്: ജയില്‍ മോചിതരായ എസ്.ഐ.ഒ പ്രവര്‍ത്തകര്‍ക്ക് ജയില്‍ കവാടത്തിനുമുന്നില്‍ സ്വീകരണം നല്‍കി. ഹൈദരാബാദ് യൂനിവേഴ്സിറ്റിയിലെ സമരത്തിന് ഐക്യദാര്‍ഢ്യം പ്രഖ്യാപിച്ച് ശനിയാഴ്ചയാണ് എസ്.ഐ.ഒ ഹെഡ് പോസ്റ്റ് ഓഫിസ് മാര്‍ച്ച് നടത്തിയത്. തുടര്‍ന്നുണ്ടായ സംഘര്‍ഷവുമായി ബന്ധപ്പെട്ടാണ് പ്രവര്‍ത്തകര്‍ റിമാന്‍ഡിലായത്. ചൊവ്വാഴ്ച 15 പേരാണ് ജയില്‍ മോചിതരായത്. ഇവരെ മാലയിട്ട് സ്വീകരിച്ച ശേഷം മൊഫ്യൂസല്‍ ബസ്സ്റ്റാന്‍ഡിലേക്ക് പ്രകടനം സംഘടിപ്പിച്ചു. തുടര്‍ന്ന് നടത്തിയ സമ്മേളം ശിഹാബ് പൂക്കോട്ടൂര്‍ ഉദ്ഘാടനം ചെയ്തു. സമരം തുടരുകതന്നെ ചെയ്യും. അടിയന്തരാവസ്ഥക്കാലത്തെ പോലെയാണ് സര്‍ക്കാര്‍ വിദ്യാര്‍ഥികളോട് പെരുമാറുന്നത്. കള്ളക്കേസില്‍ കുടുക്കിയാണ് വിദ്യാര്‍ഥികളെ ജയിലിലടച്ചത് -അദ്ദേഹം പറഞ്ഞു. എസ്.ഐ.ഒ സംസ്ഥാന പ്രസിഡന്‍റ് നഹാസ് മാള, പി. റുക്സാന, ടി. ഷാക്കിര്‍ തുടങ്ങിയവര്‍ സംസാരിച്ചു.