ഉറവിട മാലിന്യ സംസ്കരണ പദ്ധതി തുടങ്ങി

മുക്കം: മാലിന്യ നിര്‍മാര്‍ജനത്തിനും സംസ്കരണത്തിനുമായി സ്പന്ദനം റെസിഡന്‍റ്സ് അസോസിയേഷന്‍ പുതിയ പരിപാടിയുമായി രംഗത്ത്. അടുക്കളയില്‍ത്തന്നെ മാലിന്യ സംസ്കരണ സംവിധാനമൊരുക്കുന്ന ‘കിച്ചണ്‍ബിന്‍’ പദ്ധതി മുക്കം നഗരസഭ ചെയര്‍മാന്‍ വി. കുഞ്ഞന്‍ മാസ്റ്റര്‍ ഉദ്ഘാനം ചെയ്തു. കല്ലൂര്‍ ക്ഷേത്ര ഹാളില്‍ നടന്ന പരിപാടിയില്‍ ടി.എ. രാധാകൃഷ്ണന്‍ അധ്യക്ഷത വഹിച്ചു. സി.ബി.എസ്.ഇ 10ാം ക്ളാസ് പരീക്ഷയില്‍ എല്ലാ വിഷയങ്ങള്‍ക്കും എ വണ്‍ ഗ്രേഡ് നേടിയ മാളവിക വത്സന്‍, റഷ ഷറിന്‍ എന്നിവരെ ഉപഹാരം നല്‍കി അനുമോദിച്ചു. പ്രകൃതി മിത്ര അവാര്‍ഡു നേടിയ ദാമോദരന്‍ കോഴഞ്ചേരിക്കുള്ള ഉപഹാരവും നഗരസഭ ചെയര്‍മാന്‍ സമ്മാനിച്ചു. മഴക്കാല രോഗങ്ങളും പ്രതിരോധ നടപടികളും സംബന്ധിച്ച് ഡോ. സി.കെ. ഷാജി ക്ളാസെടുത്തു. നഗരസഭ കൗണ്‍സിലര്‍ മുക്കം വിജയന്‍, ഗോപാലന്‍ കൊല്ലാര്‍കണ്ടി, ഡോ.വി.പി. ഗീത, മുക്കം ബാലകൃഷ്ണന്‍, എം.വി. സുധാകരന്‍, എം.പി. പത്മനാഭന്‍ എന്നിവര്‍ സംസാരിച്ചു. മുക്കം അങ്ങാടിയില്‍ ട്രാഫിക് പരിഷ്കരണം ഉടന്‍ നടപ്പാക്കണമെന്ന് അസോസിയേഷന്‍ അധികൃതരോട് ആവശ്യപ്പെട്ടു.