കോര്‍പറേഷനില്‍ പകര്‍ച്ചവ്യാധികള്‍ പെരുകുന്നു; നിയന്ത്രിക്കാന്‍ തലപ്പത്ത് ആളില്ല

കോഴിക്കോട്: ഗുരുതരമായ പകര്‍ച്ചവ്യാധി ഭീഷണി നേരിടുന്ന കോഴിക്കോട് കോര്‍പറേഷനില്‍ ആരോഗ്യപ്രവര്‍ത്തനങ്ങള്‍ക്ക് നേതൃത്വം നല്‍കേണ്ട ഹെല്‍ത്ത് ഓഫിസറുടെ തസ്തിക അഞ്ചുവര്‍ഷമായി ഒഴിഞ്ഞുകിടക്കുന്നു. ഒരു വര്‍ഷത്തോളമായി ഹെല്‍ത്ത് സൂപ്പര്‍വൈസര്‍ എം.എം. വിജയനാണ് ഓഫിസറുടെ ചാര്‍ജിലുള്ളത്. എം.ബി.ബി.എസ് ബിരുദവും പബ്ളിക് ഹെല്‍ത്തില്‍ ഡിപ്ളോമയുമാണ് ഹെല്‍ത്ത് ഓഫിസര്‍ക്കുണ്ടായിരിക്കേണ്ട യോഗ്യത. കഴിഞ്ഞ കുറെ വര്‍ഷങ്ങളായി ഈ തസ്തികയിലേക്ക് നിയമനം നടന്നിട്ട്. ഇതുസംബന്ധിച്ച് നിരവധി തവണ കൗണ്‍സില്‍ യോഗങ്ങളില്‍ പ്രമേയം പാസാക്കിയിരുന്നു. താല്‍പര്യമുള്ളവരാരും മുന്നോട്ടുവരുന്നില്ളെന്നാണ് കോര്‍പറേഷന്‍ അധികൃതര്‍ നല്‍കുന്ന വിശദീകരണം. മെഡിക്കല്‍ ഓഫിസറുടെ തസ്തികയില്‍ നിയമനം നടത്താത്തതുമൂലം ആരോഗ്യമേഖല വളരെയധികം പ്രതിസന്ധി നേരിടുന്നുണ്ട്. നടപ്പാക്കേണ്ട പദ്ധതികളെല്ലാം ആസൂത്രണം ചെയ്യേണ്ടതും നടപ്പാക്കേണ്ടതും ഹെല്‍ത്ത് ഓഫിസറുടെ ചുമതലയാണ്. ഇതുകൂടാതെ ജനന, മരണ രജിസ്ട്രേഷന്‍ സംബന്ധമായ കാര്യങ്ങള്‍, കോര്‍പറേഷനിലെ ഡിസ്പെന്‍സറികളുടെ നേതൃത്വം തുടങ്ങി നിരവധി ചുമതലകള്‍ ഹെല്‍ത്ത് ഓഫിസറുടെ കീഴിലാണ്. മുനിസിപ്പല്‍ കോമണ്‍ സര്‍വിസില്‍ നിയമനം നടത്തുന്ന ഹെല്‍ത്ത് ഇന്‍സ്പെക്ടറാണ് പിന്നീട് കോര്‍പറേഷനുകളിലും നഗരസഭകളിലും പ്രമോഷനോടെ ഹെല്‍ത്ത് സൂപ്പര്‍വൈസറാവുന്നത്. വര്‍ഷങ്ങളായി കോഴിക്കോട് കോര്‍പറേഷനില്‍ ഹെല്‍ത്ത് സൂപ്പര്‍വൈസര്‍മാരാണ് ഓഫിസറായി താല്‍ക്കാലിക ചുമതലയേല്‍ക്കുന്നത്. ഹെല്‍ത്ത് ഓഫിസറുടേതുകൂടാതെ സൂപ്പര്‍വൈസറുടെ അധികചുമതലയാണ് നിലവിലെ ഹെല്‍ത്ത് സൂപ്പര്‍വൈസര്‍ നിര്‍വഹിക്കുന്നത്. ഹെല്‍ത്ത് സൂപ്പര്‍വൈസറുടെ വിദ്യാഭ്യാസയോഗ്യത പ്രീഡിഗ്രിയും സാനിറ്ററി/ഹെല്‍ത്ത് ഇന്‍സ്പെക്ടര്‍ ഡിപ്ളോമയുമാണ്. എം.ബി.ബി.എസ് ബിരുദവും പബ്ളിക് ഹെല്‍ത്തില്‍ പരിശീലനവും ലഭിച്ച ഹെല്‍ത്ത് ഓഫിസര്‍മാര്‍ക്കുള്ള വൈദഗ്ധ്യം സൂപ്പര്‍വൈസര്‍ പദവിയില്‍നിന്ന് സ്ഥാനക്കയറ്റം ലഭിച്ചവര്‍ക്കുണ്ടാവില്ളെന്ന് സൂപ്പര്‍വൈസര്‍മാര്‍ തന്നെ ചൂണ്ടിക്കാട്ടുന്നു. മഴക്കാല ശുചീകരണവും പ്രതിരോധപ്രവര്‍ത്തനങ്ങളും ഊര്‍ജിതമാക്കേണ്ട സാഹചര്യത്തില്‍ ഇതിന് നേതൃത്വം നല്‍കാന്‍ ആളില്ലാത്തത് ആരോഗ്യമേഖലയില്‍ പ്രതിസന്ധി സൃഷ്ടിച്ചിരിക്കുകയാണ്.