അരലക്ഷത്തിന്‍െറ ബ്രൗണ്‍ഷുഗറുമായി പിടിയില്‍

കോഴിക്കോട്: അരലക്ഷം രൂപയുടെ ബ്രൗണ്‍ഷുഗറുമായി യുവാവ് പിടിയില്‍. കോഴിക്കോട്, മലപ്പുറം ജില്ലകളിലെ ലഹരിവില്‍പനക്കാര്‍ക്ക് മുംബൈയില്‍നിന്ന് ബ്രൗണ്‍ഷുഗര്‍ എത്തിച്ചുനല്‍കുന്ന മലപ്പുറം പുതുപൊന്നാനി കാപ്പോയില്‍ കെ. ആസിഫാണ് (24) ശനിയാഴ്ച പൊലീസ് പിടിയിലായത്. നടക്കാവ് സി.ഐ ടി.കെ. അഷ്റഫും ഷാഡോ പൊലീസും ചേര്‍ന്നാണ് ആസിഫിനെ അരലക്ഷം രൂപയോളം വിലവരുന്ന നൂറോളം പൊതി ബ്രൗണ്‍ഷുഗറുമായി അറസ്റ്റ്ചെയ്യുന്നത്. മുംബൈയില്‍നിന്ന് കുറഞ്ഞ വിലക്ക് ബ്രൗണ്‍ഷുഗര്‍ വാങ്ങി ചില്ലറ വില്‍പനകാര്‍ക്ക് എത്തിച്ചുകൊടുത്താണ് ഇയാള്‍ പണമുണ്ടാക്കുന്നത്. ഇതിനു മുമ്പും കഞ്ചാവുമായി ഇയാള്‍ പിടിയിലായിട്ടുണ്ട്. ഒരു കേസില്‍ വടകര എന്‍.ഡി.പി.എസ് കോടതിയില്‍ വിചാരണ നടക്കുകയാണ്. ഇതിനിടയിലാണ് വീണ്ടും പിടിയിലായത്. മുംബൈയില്‍നിന്ന് കൊണ്ടുവന്ന ബ്രൗണ്‍ഷുഗര്‍ വെള്ളയില്‍ റെയില്‍വേ സ്റ്റേഷന്‍ പരിസരത്ത് വില്‍പന നടത്താന്‍ ശ്രമിക്കുന്നതിനിടയിലാണ് ഇയാള്‍ അറസ്റ്റിലായത്. ഒരു പൊതി ബ്രൗണ്‍ഷുഗറിന് മുംബൈയില്‍ 100 രൂപയില്‍ താഴെയാണ് വില. ഇത് 400-500 രൂപക്കാണ് ആസിഫ് ചെറുകിട കച്ചവടക്കാര്‍ക്ക് വില്‍ക്കുന്നത്. മയക്കുമരുന്നിനടിമയായ ആസിഫ് സമ്പാദിക്കുന്ന പണം സുഹൃത്തുകള്‍ക്കൊപ്പം വിനോദയാത്ര നടത്തി ധൂര്‍ത്തടിക്കുകയാണ് രീതി. മാസത്തില്‍ ഒന്നിലേറെ തവണ മുംബൈയില്‍ പോയി ബ്രൗണ്‍ഷുഗര്‍ കൊണ്ടുവരും. ഇയാളുടെ മൊഴിയുടെ അടിസ്ഥാനത്തില്‍ ചില്ലറ വില്‍പനക്കാര്‍ക്കായി പൊലീസ് അന്വേഷണം വ്യാപകമാക്കിയിട്ടുണ്ട്. ഷാഡോ പൊലീസ് അംഗങ്ങളായ വിഷ്ണു, രഞ്ജിത്, സുനില്‍, രജിത് ചന്ദ്രന്‍, ഹനീഷ്, നടക്കാവ് സി.ഐ ഓഫിസിലെ രാജീവ്, പ്രകാശന്‍ എന്നിവര്‍ അറസ്റ്റില്‍ പങ്കാളികളായി.