ഗതാഗത നിയമലംഘനം: 140 വാഹനങ്ങള്‍ക്കെതിരെ നടപടി

കോഴിക്കോട്: ഗതാഗത നിയമം ലംഘിച്ചതിന് 140 വാഹനങ്ങള്‍ക്കെതിരെ നടപടി സ്വീകരിക്കുകയും മുക്കാല്‍ ലക്ഷം രൂപ പിഴ ഈടാക്കുകയും ചെയ്തു. പരിശോധനയില്‍ നിയമാനുസൃതമല്ലാത്ത നമ്പര്‍ പ്ളേറ്റുകള്‍ ഘടിപ്പിച്ച 97 വാഹനങ്ങള്‍ക്കെതിരെയും ഇതര കുറ്റകൃത്യങ്ങള്‍ക്ക് 43 വാഹനങ്ങള്‍ക്കെതിരെയുമാണ് ആര്‍.ടി.ഒ ജെ. പോള്‍സന്‍െറ നേതൃത്വത്തില്‍ നടപടിയെടുത്തത്. ഈ ഇനത്തില്‍ 73,300 രൂപ പിഴ ഈടാക്കി. ഹെല്‍മറ്റില്ലാതെ ഇരുചക്ര വാഹനം ഓടിച്ചതിന് 16 പേര്‍ക്കെതിരെ നടപടി സ്വീകരിക്കുകയും നികുതി അടക്കാതെ സര്‍വിസ് നടത്തിയ ആറു വാഹനങ്ങള്‍ പിടിച്ചെടുക്കുകയും ചെയ്തു. ഡ്രൈവിങ് ലൈസന്‍സ് ഇല്ലാതെ വാഹനം ഓടിച്ച ഒമ്പത് പേര്‍ക്കെതിരെയും മറ്റു നിയമ ലംഘനങ്ങള്‍ക്ക് 12 പേര്‍ക്കെതിരെയും നടപടി എടുത്തതായി ആര്‍.ടി.ഒ അറിയിച്ചു.