കെ.എസ്.ആര്‍.ടി.സി ബസ് നിയന്ത്രണം വിട്ടു; വന്‍ ദുരന്തം ഒഴിവായി

മുക്കം: സംസ്ഥാനപാതയില്‍ മുത്തേരിക്കടുത്ത മാങ്ങാപ്പൊയിലില്‍ കെ.എസ്.ആര്‍.ടി.സി ബസ് നിയന്ത്രണം വിട്ട് റോഡരികിലെ പറമ്പിലേക്ക് പാഞ്ഞുകയറി. ഇടതുഭാഗത്ത് ഒരു വീടിന്‍െറ ഗെയ്റ്റ് തകര്‍ത്ത് പറമ്പില്‍കയറിയ ബസ് വൈദ്യുതി പോസ്റ്റില്‍ തട്ടാതെ രണ്ട് മരങ്ങള്‍ക്കിടയില്‍ കയറി നിന്നതിനാല്‍ യാത്രക്കാര്‍ അദ്ഭുതകരമായി രക്ഷപ്പെടുകയായിരുന്നു. ഡ്രൈവര്‍ക്കും ചില യാത്രക്കാര്‍ക്കും നിസ്സാര പരിക്കേറ്റു. ഞായറാഴ്ച വൈകീട്ട് അഞ്ചോടെയാണ് അപകടം. കാറിന് സൈഡ് കൊടുക്കുന്നതിനിടെ ബസ് നിയന്ത്രണം വിടുകയായിരുന്നെന്ന് യാത്രക്കാരില്‍ ചിലര്‍ പറഞ്ഞു. ഓടി ക്കൂടിയ നാട്ടുകാരാണ് യാത്രക്കാരെ ബസില്‍നിന്ന് പുറത്തത്തെിച്ചത്. കൂടുതല്‍ പരിക്ക് പറ്റിയ ഡ്രൈവര്‍ എന്‍.പി. ഷംസുദ്ദീനെ മുക്കം ആശുപത്രിയില്‍ പ്രവേശിപ്പിച്ചു. തൃശൂരില്‍നിന്ന് താമരശ്ശേരിയിലേക്ക് പോവുകയായിരുന്ന താമരശ്ശേരി ഡിപ്പോയിലെ ആര്‍.എസ്.എം 863 നമ്പര്‍ ബസാണ് അപകടത്തില്‍പെട്ടത്. നിയന്ത്രണം വിട്ട ബസ് ആദ്യം ഇടതുവശത്തെ മാങ്ങപൊയില്‍ ബഷീറിന്‍െറ വീടിന്‍െറ ഗെയ്റ്റ് തകര്‍ത്ത് പറമ്പിലേക്ക് കയറി അതേവേഗത്തില്‍ പിന്നോട്ട് പോയി തൊട്ടടുത്ത പറമ്പിലേക്ക് കയറുകയായിരുന്നു. ഇതിനടുത്തുള്ള വൈദ്യുതി പോസ്റ്റില്‍ തട്ടിയാല്‍ വന്‍ ദുരന്തം സംഭവിക്കുമായിരുന്നു. അപകടത്തെ തുടര്‍ന്ന് സംസ്ഥാനപാതയില്‍ ഏറെനേരം ഗതാഗതം തടസ്സപ്പെട്ടു.