ത്രിവേണിസ്റ്റോര്‍ ഒഴിപ്പിക്കല്‍ഭീഷണിയില്‍

വടകര: കെട്ടിടം ഒഴിഞ്ഞുകൊടുക്കണമെന്ന കോടതി ഉത്തരവുണ്ടായിട്ടും പുതിയ ഇടം കണ്ടത്തൊനാവാതെ ത്രിവേണിസ്റ്റോര്‍ ഒഴിപ്പിക്കല്‍ഭീതിയില്‍. വാടക വര്‍ധിപ്പിക്കണമെന്നാവശ്യപ്പെട്ട് ഉടമ നല്‍കിയ കേസില്‍ കണ്‍സ്യൂമര്‍ ഫെഡ് പരാജയപ്പെട്ടതോടെയാണ് സ്റ്റോറും ഗോഡൗണും കുടിയൊഴിയേണ്ട സാഹചര്യം വന്നത്. കോടതിനിര്‍ദേശപ്രകാരം ഇക്കഴിഞ്ഞ ഡിസംബര്‍ 31നകം ഒഴിഞ്ഞുകൊടുക്കേണ്ടതാണ്. പകരം സംവിധാനമെന്നനിലയില്‍ തൊട്ടടുത്ത കെട്ടിടത്തിലേക്ക് മാറ്റുന്നതിനായി ചില ചര്‍ച്ചകള്‍ നടന്നെങ്കിലും തീരുമാനമായില്ല. ഈ സാഹചര്യത്തില്‍ ജീവനക്കാരുള്‍പ്പെടെ കടുത്ത ആശങ്കയിലാണ്. സ്റ്റോര്‍ കുടിയൊഴിപ്പിക്കേണ്ട ഉത്തരവ് വന്നിട്ടും അധികൃതര്‍ അപ്പീല്‍ സ്വീകരിക്കാത്തത് സംശയത്തിനിടയാക്കിയിരുന്നു. ഇക്കാര്യത്തില്‍ സര്‍ക്കാര്‍ ഒത്തുകളിക്കുന്നതായി ആക്ഷേപമുയര്‍ന്നിരുന്നു. നല്ലനിലയില്‍ പ്രവര്‍ത്തിക്കുന്ന സ്റ്റോറിനെ ഇല്ലാതാക്കാനുള്ള നീക്കം നേരത്തേയും നടന്നതായാണ് പരാതി. വടകര പുതിയ ബസ്സ്റ്റാന്‍ഡിനടുത്തുള്ള എടോടി റോഡിലെ നിലവിലെ സ്ഥലം നഷ്ടപ്പെടുന്നതോടെ പ്രവര്‍ത്തനം നിലക്കുന്ന ആശങ്കയുണ്ട്. 18 വര്‍ഷം മുമ്പ് സിറ്റി കോംപ്ളക്സില്‍ തുടങ്ങിയ ഷോറൂമിനോടുചേര്‍ന്ന് പാക്കിങ് യൂനിറ്റും ചെറിയ ഗോഡൗണുമാണുള്ളത്. നേരത്തെ പഴങ്കാവിലുണ്ടായിരുന്ന ഗോഡൗണും പാക്കിങ് യൂനിറ്റും വാടകപ്രശ്നത്തെ തുടര്‍ന്ന് പൂട്ടിയതോടെ ഈ ഷോറൂമിനോട് ചേര്‍ക്കുകയായിരുന്നു. 20 ശതമാനം വിലക്കുറവില്‍ നിത്യോപയോഗ സാധനങ്ങള്‍ ലഭിക്കുന്ന ത്രിവേണിയില്‍നിന്നാണ് സബ്ജയില്‍, നവോദയ വിദ്യാലയം, കെ.ടി.ഡി.സി, വിവിധ ആശുപത്രികള്‍, വിവിധ പ്രീമെട്രിക് ഹോസ്റ്റലുകള്‍ എന്നിവിടങ്ങളിലേക്ക് സാധനങ്ങള്‍ കൊണ്ടുപോകുന്നത്. താലൂക്കിലെ മൂന്നു നിയോജക മണ്ഡലത്തിലേക്കുള്ള സഞ്ചരിക്കുന്ന മാവേലിസ്റ്റോര്‍ നിര്‍ത്താനാണ് സാധ്യതയെന്നറിയുന്നു. സഞ്ചരിക്കുന്ന സ്റ്റോറുകളെ ആശ്രയിക്കുന്ന നൂറുകണക്കിന് കുടുംബങ്ങളാണ് വടകര താലൂക്കിലുള്ളത്. വടകരയിലെ ത്രിവേണിസ്റ്റോറിനു പുറമേ നാദാപുരം, കക്കട്ട്, കടിയങ്ങാട്, പേരാമ്പ്ര, പന്നിമുക്ക് എന്നിവിടങ്ങളിലും ത്രിവേണിസ്റ്റോറുകളുണ്ട്. കൂടാതെ വടകര, കുറ്റ്യാടി, നാദാപുരം, പേരാമ്പ്ര നിയോജകമണ്ഡലങ്ങളില്‍ സഞ്ചരിക്കുന്ന സ്റ്റോറുകളുമുണ്ട്. ഇവിടേക്കെല്ലാം സാധനങ്ങള്‍ കൊണ്ടുപോകുന്നത് വടകരയിലെ ഗോഡൗണില്‍നിന്നാണ്.