ലഹരിവ്യാപനം: നഗരസഭ നടപടി ശക്തമാക്കുന്നു

കൊടുവള്ളി: കൊടുവള്ളിയില്‍ വ്യാപകമായ ലഹരിവിപണനത്തിനും ഉപയോഗത്തിനുമെതിരെ ബോധവത്കരണ പരിപാടികള്‍ നടത്താനും യോജിച്ച ചെറുത്തുനില്‍പ് നടത്താനും കൊടുവള്ളി നഗരസഭ വിളിച്ചുചേര്‍ത്ത രാഷ്ട്രീയ-സാമൂഹിക- സാംസ്കാരിക-മതസംഘടനാ പ്രവര്‍ത്തകരുടെ യോഗം തീരുമാനിച്ചു. ഡിവിഷന്‍തലം കേന്ദ്രീകരിച്ച് ലഹരിവിരുദ്ധ പ്രവര്‍ത്തനങ്ങള്‍ സംഘടിപ്പിക്കും. അന്യസംസ്ഥാന തൊഴിലാളികള്‍ താമസിക്കുന്ന സ്ഥലങ്ങളില്‍ പൊലീസിനെ ഉപയോഗിച്ച് മിന്നല്‍ പരിശോധന നടത്താനും പ്രധാന കേന്ദ്രങ്ങളില്‍ സി.സി.ടി.വി കാമറകള്‍ സ്ഥാപിക്കാനും യോഗം തീരുമാനിച്ചു. നഗരസഭ ചെയര്‍പേഴ്സന്‍ ശരീഫ കണ്ണാടിപ്പൊയില്‍ ഉദ്ഘാടനം ചെയ്തു. വൈസ് ചെയര്‍മാന്‍ എ.പി. മജീദ് അധ്യക്ഷത വഹിച്ചു. സി.ഐ എ. പ്രേംജിത്ത്, ഐ. രാജശ്രീ, എം.എം. അഹമ്മദ്കോയ, പി.ടി. സദാശിവന്‍, സലീം അണ്ടോണ, ടി.വി. ആലിക്കുട്ടി, ഒ.പി. റഷീദ് എന്നിവര്‍ സംസാരിച്ചു. സ്ഥിരം സമിതി അധ്യക്ഷന്‍ കെ. ശിവദാസന്‍ സ്വാഗതവും അധ്യക്ഷ റസിയ ഇബ്രാഹിം നന്ദിയും പറഞ്ഞു.