പൊലീസ് ചമഞ്ഞ് തട്ടിപ്പു നടത്തിയ യുവാവ് അറസ്റ്റില്‍

തിരുവമ്പാടി: പൊലീസ് ചമഞ്ഞ് സ്ത്രീപീഡന കേസ് പ്രതിയുടെ ബന്ധുക്കളില്‍നിന്ന് പണം തട്ടിയ യുവാവ് അറസ്റ്റില്‍. അരീക്കോട് പൂവത്തിക്കല്‍ പുളക്കചാലില്‍ അബ്ദുല്‍ അസീസ് (34) എന്ന അറബി അസീസാണ് തിരുവമ്പാടി പൊലീസിന്‍െറ പിടിയിലായത്. തിരുവമ്പാടി തൊണ്ടിമ്മല്‍ സ്വദേശിയായ പീഡനക്കേസ് പ്രതിയുടെ ബന്ധുക്കളെ വഞ്ചിച്ച് മൂന്നു തവണയായി 11,600 രൂപ അപഹരിക്കുകയായിരുന്നു അബ്ദുല്‍ അസീസെന്ന് തിരുവമ്പാടി എസ്.ഐ ശംഭുനാഥന്‍ പറഞ്ഞു. കാസര്‍കോട്, കണ്ണൂര്‍, കോഴിക്കോട്, മലപ്പുറം ജില്ലകളിലായി 30ഓളം വഞ്ചന, പണാപഹരണ കേസുകളില്‍ ഇയാള്‍ പ്രതിയാണ്. ഇയാളുടെ കൂട്ടാളിയായ യുവാവിനായി പൊലീസ് അന്വേഷണം തുടങ്ങി. പ്രതിയെ താമരശ്ശേരി ജുഡീഷ്യല്‍ മജിസ്ട്രേറ്റ് കോടതി രണ്ടാഴ്ചത്തേക്ക് റിമാന്‍ഡ് ചെയ്തു.