ഓണ്‍ലൈന്‍ മദ്യവിപണനം: ബിവറേജസ് ഒൗട്ട്ലെറ്റിലേക്ക് യുവമോര്‍ച്ച മാര്‍ച്ച്

കോഴിക്കോട്: ഓണത്തിന് ഓണ്‍ലൈന്‍ വഴി മദ്യം വില്‍ക്കാന്‍ കണ്‍സ്യൂമര്‍ഫെഡ് പ്രത്യേക കൗണ്ടറുകള്‍ തുറക്കുമെന്ന കണ്‍സ്യൂമര്‍ഫെഡ് ചെയര്‍മാന്‍ എം. മെഹ്ബൂബിന്‍െറ പ്രസ്താവനയില്‍ പ്രതിഷേധിച്ച് യുവമോര്‍ച്ചയുടെ നേതൃത്വത്തില്‍ കണ്‍സ്യൂമര്‍ഫെഡിന്‍െറ കോഴിക്കോട് പാവമണി റോഡിലുള്ള മദ്യഷാപ്പിലേക്ക് മാര്‍ച്ച് നടത്തി. മദ്യംവാങ്ങാന്‍ വരിനിന്നവരെ പറഞ്ഞുവിട്ടുകൊണ്ട് സംഘം ഒൗട്ട്ലെറ്റ് അടപ്പിച്ചു. കണ്‍സ്യൂമര്‍ ഫെഡിന്‍െറ കീഴിലുള്ള 36 ബിവറേജ് ഒൗട്ട്ലെറ്റുകളില്‍ ഓണ്‍ലൈന്‍ മദ്യവിപണനം നടത്താനുള്ള നീക്കം ഓണക്കാലത്തെ മദ്യത്തില്‍ മുക്കിക്കൊല്ലാനുള്ള ആസൂത്രിതനീക്കത്തിന്‍െറ ഭാഗമാണെന്നും എന്തുവില കൊടുത്തും ഈ നീക്കത്തെ ചെറുക്കുമെന്നും യുവമോര്‍ച്ച സംസ്ഥാന പ്രസിഡന്‍റ് അഡ്വ. കെ.പി. പ്രകാശ് ബാബു പറഞ്ഞു. അത്തം മുതല്‍ ചതയം വരെ സമ്പൂര്‍ണ മദ്യനിരോധം നടപ്പാക്കണമെന്നാവശ്യപ്പെട്ട് പ്രക്ഷോഭത്തിന് യുവമോര്‍ച്ച നേതൃത്വം നല്‍കുമെന്നും അദ്ദേഹം പറഞ്ഞു.