എയര്‍ഹോണ്‍: നടപടി തുടങ്ങി

കോഴിക്കോട്: കടുത്ത ശാരീരിക വൈകല്യത്തിനിടയാക്കുംവിധം എയര്‍ഹോണ്‍ ഉപയോഗിക്കുന്ന വാഹനങ്ങള്‍ക്കെതിരെ ആര്‍.ടി.ഒയുടെ നേതൃത്വത്തില്‍ നടപടി തുടങ്ങി. ടാക്സ് അടയ്ക്കാതെയും സുരക്ഷിതത്വമില്ലാതെയും സര്‍വിസ് നടത്തുന്ന വാഹനങ്ങള്‍ക്കെതിരെ നടപടി കര്‍ശനമാക്കാനാണ് ട്രാന്‍സ്പോര്‍ട്ട് കമീഷണര്‍ ടോമിന്‍ ജെ. തച്ചങ്കരിയുടെ നിര്‍ദേശം. ഇതോടെയാണ് വിപുലമായ പരിശോധന തുടങ്ങിയത്. നഗരത്തില്‍ എയര്‍ഹോണ്‍ ഘടിപ്പിച്ച 50 വാഹനങ്ങള്‍ക്കെതിരെ ആര്‍.ടി.ഒ നടപടിയെടുത്തു. ടാക്സ് അടയ്ക്കാതെ സര്‍വിസ് നടത്തിയ രണ്ട് ബസ് ഉള്‍പ്പെടെ നാല് വാഹനങ്ങള്‍ കസ്റ്റഡിയിലെടുത്തു. സുരക്ഷിതമല്ലാതെ സര്‍വിസ് നടത്തിയ ഒരു സ്വകാര്യ ബസിന്‍െറ ഫിറ്റ്നസ് റദ്ദാക്കിയിട്ടുണ്ട്. പിടികൂടിയ വാഹനങ്ങളില്‍നിന്ന് ജോയന്‍റ് ആര്‍.ടി.ഒ കെ.കെ. സുരേഷ്കുമാറിന്‍െറ നേതൃത്വത്തിലെ സംഘം എയര്‍ഹോണ്‍ നീക്കം ചെയ്തു. പരിശോധനയെ തുടര്‍ന്ന് 48,000 രൂപ പിഴ ഈടാക്കി. നഗരപരിധിക്കുള്ളിലും തിരക്കേറിയ റൂട്ടുകളിലും 60 ഡെസിബലില്‍ താഴെയുള്ള ഹോണ്‍ മാത്രമേ ഉപയോഗിക്കാവൂ എന്നാണ് മോട്ടോര്‍ വാഹന വകുപ്പ് വ്യവസ്ഥ. സ്കൂള്‍, കോളജ്, ആരാധനാലയങ്ങള്‍, സര്‍ക്കാര്‍ ഓഫിസുകള്‍, ആശുപത്രി തുടങ്ങിയവയുടെ പരിസരങ്ങളില്‍ ഒരു തരത്തിലുമുള്ള ഹോണും ഉപയോഗിക്കാന്‍ പാടില്ല. സാധാരണ ഹോണുകളുമായി ഫിറ്റ്നസ് ടെസ്റ്റിന് എത്തുന്ന വാഹനങ്ങള്‍ ടെസ്റ്റിനുശേഷം വലിയ ശബ്ദം പുറപ്പെടുവിക്കുന്നതരം ഹോണുകള്‍ ഉപയോഗിക്കുകയാണ് പതിവ്. കുട്ടികള്‍ ദിവസവും ഈ ശബ്ദം കേള്‍ക്കുന്നത് കേള്‍വിശക്തിക്ക് സാരമായ തകരാര്‍ വരുത്തുന്നതായി കണ്ടത്തെിയിട്ടുണ്ട്. ഇരുചക്രവാഹനങ്ങളിലും മറ്റും യാത്ര ചെയ്യുന്ന കൈക്കുഞ്ഞുങ്ങളുടെ ചെവിപൊട്ടുംവിധത്തിലാണ് മത്സരയോട്ടത്തിനിടെ ചില ബസുകള്‍ ഹോണ്‍ പ്രയോഗിക്കുന്നത്. ഒരു വയസ്സില്‍ താഴെ പ്രായമുള്ള കുഞ്ഞുങ്ങളുടെ ചെവിയില്‍ ഇത്തരം ശബ്ദം പതിച്ചാല്‍ വളരെവേഗം കേള്‍വിശക്തി നഷ്ടപ്പെടുമെന്നും അത് ജീവിതകാലം മുഴുവന്‍ നീണ്ടുനില്‍ക്കുമെന്നും ഡോക്ടര്‍മാര്‍ പറയുന്നു. എയര്‍ഹോണുകള്‍ ഉള്‍പ്പെടെ ഡെസിബല്‍ കൂടിയ ഹോണുകള്‍ ചെറുവാഹനങ്ങള്‍ പോലും ഉപയോഗിക്കുന്നുണ്ട്. വാഹനങ്ങള്‍ പലതും പൊലീസിനെ കാണുമ്പോഴും നഗരത്തില്‍ പ്രവേശിക്കുമ്പോഴും ഹോണുകളുടെ കണക്ഷന്‍ വേര്‍പെടുത്തുകയാണ് ചെയ്യാറ്. എന്നാല്‍, ഇപ്പോള്‍ ഗതാഗത വകുപ്പിനും പൊലീസിനും അനുവദിച്ച ഡെസിബല്‍ മീറ്റര്‍ വാഹനത്തില്‍ ഉപയോഗിക്കുന്ന ഹോണുകള്‍ ഏതെന്ന് പെട്ടെന്ന് കണ്ടത്തൊവുന്ന ആധുനികരീതിയിലുള്ളതാണ്. ട്രാഫിക് പൊലീസിന് അനുവദിച്ച ഡെസിബല്‍ മീറ്റര്‍ ഇതുവരെ ഉപയോഗിച്ചു തുടങ്ങിയിട്ടില്ല. ഇന്ത്യയില്‍ നിര്‍മിക്കുന്ന ഹോണുകള്‍ നിയമപരിധിക്കകത്തുമാത്രമുള്ള ശബ്ദം പുറപ്പെടുവിക്കുന്നതാണ്. എന്നാല്‍, വന്‍ശബ്ദം പുറപ്പെടുവിക്കുന്ന ചൈനീസ് നിര്‍മിത ഹോണുകളാണ് ഉപയോഗിക്കുന്നവയില്‍ ഏറെയും. ഇവക്ക് വിലയും കുറവാണ്.