ഹിരോഷിമ ദുരന്തദിനാചരണത്തിന് ഇരകളുടെ നാട്ടില്‍നിന്ന് കാനാ മറ്റ്സുയിയത്തെി

കുറ്റ്യാടി: കായക്കൊടി ഹൈസ്കൂളില്‍ നടത്തിയ ഹിരോഷിമ ദുരന്തദിനാചരണത്തിന് ജപ്പാന്‍കാരിയായ കാനാ മറ്റ്സുയിയത്തെി. ടോക്യോ സര്‍വകലാശാലയിലെ ഫോറിന്‍ സ്റ്റഡീസ് ബിരുദവിദ്യാര്‍ഥിയാണ് യുദ്ധവിരുദ്ധ സന്ദേശം നല്‍കാനത്തെിയ കാനാ മറ്റ്സുയി. കഠിനാധ്വാനവും ആത്മാര്‍ഥതയും കൈമുതലാക്കി 1945ലെ ദുരന്തത്തെ അതിജീവിക്കാനും ജപ്പാനെ ലോകത്തിലെ വികസിത രാജ്യങ്ങളിലൊന്നാക്കാനും തങ്ങള്‍ക്ക് കഴിഞ്ഞതായി അവര്‍ പറഞ്ഞു. മാതൃഭാഷയിലും ഇംഗ്ളീഷിലും മലയാളത്തിലുമായി അവര്‍ യുദ്ധക്കെടുതികള്‍ വിവരിച്ചു. 2011ലെ സൂനാമിയും ജപ്പാനെ ബാധിച്ച മറ്റൊരു ദുരിതമായിരുന്നു. അന്ന് ജാപ്പനീസ് ജനതക്ക് ആശ്വാസവും പ്രോത്സാഹനവുമായി പാടിയ ഗാനം അവര്‍ ആലപിച്ചു. അവര്‍ കുട്ടികള്‍ക്കു മുന്നില്‍ വെള്ളക്കൊക്കിനെ നിര്‍മിച്ച് കാണിച്ചു. ഹെഡ്മിസ്ട്രസ് കെ.പി. കമല ഉപഹാരം നല്‍കി. വി.പി. കുഞ്ഞബ്ദുല്ല, ഒ.പി. അഷ്റഫ്, ഹയര്‍ സെക്കന്‍ഡറി സ്കൂള്‍ പ്രിന്‍സിപ്പല്‍ അബൂബക്കര്‍, കെ.പി. സുരേഷ്, കെ. ജയരാജന്‍, എം.പി. മോഹന്‍ദാസ്, സാമിയ മൊയ്തു എന്നിവര്‍ സംസാരിച്ചു.