കക്കാടംപൊയില്‍ മത്സ്യ ഫാക്ടറി അടച്ചുപൂട്ടണമെന്ന് ബഹുജന കണ്‍വെന്‍ഷന്‍

തിരുവമ്പാടി: മത്സ്യ ഫാക്ടറിയിലെ മലിനീകരണത്തിനെതിരെ കക്കാടംപൊയിലില്‍ ബഹുജന കണ്‍വെന്‍ഷന്‍. മാലിന്യം കലര്‍ന്ന പുകയും മലിനജലവും പുറത്തുവിടുന്ന ഫാക്ടറി അടച്ചുപൂട്ടണമെന്ന് കണ്‍വെന്‍ഷന്‍ ആവശ്യപ്പെട്ടു. മാലിന്യപ്രശ്നം മൂലം പ്രദേശവാസികള്‍ രോഗബാധിതരാകുകയാണ്. ആരാധനാലയം, സ്കൂളുകള്‍, കോണ്‍വന്‍റുകള്‍ എന്നിവക്കും മലിനീകരണം ഭീഷണിയായിരിക്കയാണ്. എ.കെ.സി.സിയുടെ നേതൃത്വത്തില്‍ നടന്ന കണ്‍വെന്‍ഷന്‍ പ്രത്യക്ഷ സമരമാരംഭിക്കുമെന്ന് മുന്നറിയിപ്പ് നല്‍കി. മുക്കം മേഖലാ പരിസ്ഥിതി സംരക്ഷണ സമിതി ചെയര്‍മാന്‍ എ.എസ്. ജോസ് ഉദ്ഘാടനം ചെയ്തു. ഫാ. വര്‍ക്കി ചെറുപിള്ളേട്ട് അധ്യക്ഷത വഹിച്ചു. ഫാ. മാത്യു തിട്ടയില്‍, സോമി പുലകുടിയില്‍, സണ്ണി മുത്തനാട്ട്, തങ്കച്ചന്‍ പാട്ടശ്ശേരി, ദേവസ്യ കണ്ടത്തില്‍, ബൈജു കുരിശിങ്കല്‍, ഫെബിഷ് കൊട്ടാരത്തില്‍, ബാബു പാറക്കല്‍ എന്നിവര്‍ സംസാരിച്ചു.